काठमाडौं । दोस्रो संस्करणको नेपाल प्रिमियर लिग (एनपीएल) अन्तर्गत बुधबार विराटनगर किंग्स र चितवन राइनोज आमनेसामने हुने भएका छन् । विराटनगरको कप्तानी सन्दीप लामिछानेले गरेका छन् भने चितवनलाई कुशल मल्लले नेतृत्व गरिरहेका छन् । खेल कीर्तिपुरस्थित त्रिवि अन्तर्राष्ट्रिय क्रिकेट मैदानमा दिउँसो ४ बजे सुरु हुनेछ ।
तीन खेल खेलिसकेको विराटनगरले अहिलेसम्म अपराजित यात्रा कायम राख्दै लगातार तीन जितसँगै ६ अंक जोडेको छ । दुई खेल खेलेको चितवनले भने एउटा जितसहित २ अंक जोडेको छ । दुवै टोलीका लागि आजको खेल महत्वपूर्ण मानिएको छ । विराटनगर शीर्ष स्थानमा उक्लिन चाहन्छ भने चितवनले तेस्रो खेलबाट जित निकाल्दै अंक थप्ने लक्ष्य लिएको छ ।
यस खेलमा विराटनगरका सन्दीप लामिछानेको घातक बलिङ र चितवनका रवि बोपाराको उत्कृष्ट ब्याटिङ मुख्य आकर्षण हुने अपेक्षा गरिएको छ । बोपाराले यस सिजनका दुई खेलमै अर्धशतक प्रहार गर्दै राम्रो लय समाएका छन् भने सन्दीप दुई खेलमै ७ विकेट लिन सफल हुँदै सर्वाधिक विकेटकर्ता बनेका छन् ।
विराटनगरले पहिलो खेलमा पोखरालाई ५३ रनले, दोस्रो खेलमा काठमाडौंलाई ५ विकेटले र तेस्रो खेलमा जनकपुरलाई ९ रनले हार दिएको थियो । समान अंक भए पनि रनरेटका आधारमा विराटनगर अहिले दोस्रो स्थानमा छ । चितवनले पहिलो खेलमा कर्णालीलाई ४ विकेटले हराए पनि दोस्रो खेलमा लुम्बिनीसँग ६ विकेटले पराजित भएको थियो, जसले टोलीलाई तालिकाको पाँचौं स्थानमा धकेलेको छ ।
यस सिजनको एनपीएलमा जनकपुर बोल्टस, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाण्डु गुर्खाज र लुम्बिनी लायन्स गरी आठ फ्रेन्चाइज टोली प्रतिस्पर्धामा छन् ।
अपराजित सुदूरपश्चिम र विराटनगरले समान ६ अंक बनाएका छन् । रनरेटका आधारमा सुदूरपश्चिम शीर्ष स्थानमा रहेको छ । चार खेलबाट ४ अंक जोडेको काठमाडौं तेस्रो स्थानमा छ भने लुम्बिनी, चितवन र कर्णाली क्रमशः चौथो, पाँचौं र छैटौं स्थानमा छन्। जनकपुर र पोखराले भने खेलिएका दुई-दुई खेलमा अहिलेसम्म अंक बटुल्न सकेका छैनन् ।
मंसिर १ देखि सुरु भएको एनपीएल २७ गतेसम्म कीर्तिपुरमै हुने खेलका लागि नेपाल क्रिकेट सङ्घ (क्यान)ले प्रत्येक दिन ९ हजार ४५३ टिकट बिक्री गर्दै आएको छ ।
प्रतिक्रिया