काठमाडौं । नेपाली कांग्रेसभित्र विशेष महाधिवेशन माग गर्दै आएको समूहले आज काठमाडौंको प्रदर्शनीमार्गस्थित राष्ट्रिय सभागृहमा विशेष भेला आह्वान गरेको छ । दिउँसो १ बजे सुरु हुने उक्त भेलाले विशेष महाधिवेशनको मिति तोक्न केन्द्रीय कार्यसमितिमाथि दबाब वाढाउने बताइएको छ ।
विशेष महाधिवेशनको माग गर्दै हस्ताक्षर गरेका ५४ प्रतिशत महाधिवेशन प्रतिनिधिहरू आजको भेलामा सहभागी हुनेछन् । कांग्रेस केन्द्रीय समिति बैठक भोलि (बिहीबार) बस्ने भएपछि विशेष महाधिवेशन पक्षधरले बैठकअघि नै संगठित दबाब सिर्जना गर्ने उद्देश्य राखेको बुझिएको छ ।
गत असोज २८ गतेदेखि जारी कांग्रेस केन्द्रीय समिति बैठकमा पार्टीको १५औँ महाधिवेशन फागुन २१ मा हुने प्रतिनिधिसभा चुनावअघि वा पछि गर्ने भन्ने विषयमा तीव्र मतभेद देखिएको छ । महामन्त्रीद्वय गगन थापा र विश्वप्रकाश शर्मा पक्षले चुनावभन्दा पहिल्यै नियमित महाधिवेशन वा त्यो सम्भव नभए विशेष महाधिवेशन गर्नुपर्ने अडान लिएका छन् । तर सभापति शेरबहादुर देउवा पक्षले चुनावअघि महाधिवेशन सम्भव नहुने भन्दै आएको छ ।
कांग्रेसका ५४ प्रतिशत महाधिवेशन प्रतिनिधिहरूले विशेष महाधिवेशनको मागसहित असोज २९ गते केन्द्रीय कार्यालयमा हस्ताक्षरसहित निवेदनसमेत दर्ता गरिसकेका छन् । आजको भेला विशेष महाधिवेशन पक्षधर नेता गुरुराज घिमिरेको अगुवाइमा हुँदैछ । तर महामन्त्रीद्वय थापा र शर्मा भने उक्त भेलामा सहभागी नहुने बुझिएको छ ।
विशेष भेलालाई नरहरि आचार्य, महेश आचार्य, तारानाथ रानाभाट, बलदेव शर्मा मजगैयाँलगायत वरिष्ठ नेताहरूले सम्बोधन गर्ने तयारी छ । यसअघि विशेष महाधिवेशन पक्षधरले मंगलबार काठमाडौं उपत्यकाका नेताहरू, बागमती प्रदेशका जिल्ला तथा क्षेत्रीय सभापतिहरू, भ्रातृ तथा शुभेच्छुक संगठनका प्रतिनिधिसँग छुट्टाछुट्टै छलफल गरेको थियो ।
प्रतिक्रिया