काठमाडौं । नेपाल प्रिमियर लिग (एनपीएल)मा साविक विजेता जनकपुर बोल्ट्सविरुद्ध पोखरा एभेन्जर्सले उत्कृष्ट सुरुआत गरेको छ । बिहीबार कीर्तिपुरस्थित त्रिवि क्रिकेट मैदानमा टस जितेर पहिलो ब्याटिङ गरेको पोखराले पावर प्लेका ६ ओभरमै कुनै विकेट नखोसी ४५ रनको बलियो आधार तयार गरेको हो ।
पोखराका ओपनर दिनेश खरेल २७ रनमा तथा उनका साथी एडम रोसिङ्टन १८ रनमा क्रिजमा उभिइरहेका छन् । दुवै खेलाडीले संयमित तर आक्रमक ब्याटिङ गर्दै टोलीलाई उत्कृष्ट सुरुआत दिलाएका छन् ।
दुवै टिमका लागि आजको खेल निकै महत्वपूर्ण मानिएको छ, किनकि जनकपुर र पोखरा दुबै टोलीले यसअघि सिजनका खेलहरूमा एकपटक पनि जित निकाल्न सकेका छैनन् ।
जनकपुर बोल्ट्सले पहिलो खेलमा काठमाण्डू गोर्खाजसँग ५ विकेटले तथा दोस्रो खेलमा विराटनगर किंग्ससँग ९ रनले पराजय बेहोरेको थियो । उता पोखरा एभेन्जर्सले पहिलो खेलमा विराटनगरसँग ५३ रनले र दोस्रो खेलमा सुदूरपश्चिम रोयल्ससँग १८ रनले हार व्यहोरेको थियो ।
आफ्ना अघिल्ला हारलाई भुलेर दुवै टिम आज पहिलो जितका लागि संघर्ष गरिरहेका छन् ।
प्रतिक्रिया