काठमाडौं । दोस्रो संस्करणको नेपाल प्रिमियर लिग (एनपीएल) क्रिकेटमा लगातार खेलपछि सोमबार खेल नभई ‘ब्रेक’ दिइएको छ । आइतबार सम्पन्न १९ औं खेलमा काठमाडौं गुर्खाजले कर्णाली याक्सलाई पाँच विकेटले पराजित गरेसँगै अंक तालिकाको प्रतिस्पर्धा झनै चर्किएको छ ।
अंक तालिकामा अपराजित सुदूरपश्चिम रोयल्स १० अंकसहित प्लेअफमा पुगिसकेको छ । काठमाडौं गुर्खाजले पाँच खेलमा दुई हार व्यहोर्दै ८ अंक जोडेको छ । विराटनगर किंग्सको पनि समान ८ अंक भए पनि रनरेटका आधारमा काठमाडौं दोस्रो र विराटनगर तेस्रो स्थानमा छन् ।
चितवन राइनोज र लुम्बिनी लायन्स दुवैको ४-४ अंक छ । लुम्बिनीले पाँच खेल सकाइसकेको छ भने चितवनले चार खेल खेलेको छ । रनरेटमा चितवन चौथो र लुम्बिनी पाँचौँ स्थानमा रहेका छन् । कर्णाली याक्स र पोखरा एभेन्जर्सको दुई-दुई अंक छ । यीमध्ये कर्णाली छैटौँ र पोखरा सातौँ स्थानमा छन् । जनकपुर बोल्ट्स भने अझै अंकविहीन अवस्थासहित तालिकाको पुछारमै छ ।
कीर्तिपुरस्थित त्रिवि मैदानमा दिउँसो र राति गरी भइरहेका प्रतियोगितामा नेपाल क्रिकेट सङ्घ (क्यान)ले प्रत्येक खेलका लागि ९ हजार ४५० टिकट बिक्री गर्दै आएको छ । मंसिर १ गतेदेखि सुरु भएको एनपीएल २७ गतेसम्म चल्नेछ । लिग चरण, तीन प्लेअफ तथा फाइनल गरी प्रतियोगितामा ३२ खेल सञ्चालन हुनेछन् ।
सोमबार विश्राम लिएको एनपीएलमा मंगलबार पुनः दुई खेल हुँदैछन् । पहिलो खेलमा जनकपुर बोल्ट्स र चितवन राइनोज भिड्दैछन् भने दोस्रो खेलमा पोखरा एभेन्जर्स र कर्णाली याक्स आमनेसामने हुनेछ ।
एनपीएलमा जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाडौं गुर्खाज र लुम्बिनी लायन्स गरी आठ फ्रेन्चाइज टोलीले प्रतिस्पर्धा गरिरहेका छन् ।
प्रतिक्रिया