काठमाडौं । लुम्बिनी विकास कोषका नवनियुक्त सदस्य सचिव दीपक श्रेष्ठले बुधबार दिउँसो कोषको केन्द्रीय कार्यालयमा हाजिरी गर्दै औपचारिक रूपमा पदभार ग्रहण गरेका छन् । प्रधानमन्त्री तथा संस्कृति, पर्यटन तथा नागरिक उड्डयनमन्त्री सुशीला कार्कीले श्रेष्ठलाई सदस्य सचिवमा मनोनयन गरेपछि उनले आजदेखि जिम्मेवारी सम्हालेका हुन् ।
श्रेष्ठले केही समय नागरिक उड्डयन प्राधिकरणमा काम गरिसकेपछि २०६७ सालमा नेपाल खानेपानी संस्थानमा प्रवेश गरेका थिए । संस्थानअन्तर्गत बनेपा र धरान शाखामा प्रमुखका रूपमा जिम्मेवारी सम्हालेपछि उनी २०७० सालमा अख्तियार दुरुपयोग अनुसन्धान आयोगमा कार्यरत रहे ।
अख्तियारमा रहँदै उनले झन्डै आठ वर्षसम्म भ्रष्टाचारसम्बन्धी अनुसन्धानमा सक्रिय भूमिका निर्वाह गरेका थिए । उत्कृष्ट कार्यसम्पादनका लागि खानेपानी संस्थान र अख्तियार दुवै संस्थाबाट उनले सम्मान तथा पुरस्कार प्राप्त गरेका थिए ।
पछिल्लो समय उनले खानेपानी संस्थानको प्राविधिक अनुगमन तथा निरीक्षण शाखाको प्रमुखका रूपमा काम गर्दै आएका थिए ।
प्रतिक्रिया