बेन र भीमको अर्धशतकले काठमाडौंले पोखरालाई दियो १६६ रनको लक्ष्य

काठमाडौं । ओपनर बेन चार्ल्सवर्थ र भीम सार्कीको उत्कृष्ट अर्धशतकपछि काठमाण्डू गोर्खाजले नेपाल प्रिमियर लिग (एनपीएल)मा पोखरा एभेन्जर्सलाई १६६ रनको लक्ष्य प्रस्तुत गरेको छ । बिहीबार कीर्तिपुरस्थित त्रिवि क्रिकेट रंगशालामा टस हारेर पहिले ब्याटिङ गरेका काठमाण्डूले निर्धारित २० ओभरमा आठ विकेटको क्षतिमा १६५ रन बनायो ।

काठमाण्डूका ओपनर बेनले ५५ बलमा पाँच चौका र दुई छक्का प्रहार गर्दै सर्वाधिक ६४ रन जोडे । ७९-५ को चुनौतीपूर्ण अवस्थामा उनी भीम सार्कीसँग मिलेर छैटौँ विकेटका लागि ७६ रनको महत्वपूर्ण साझेदारी गर्दै टोलीको पारी सम्हाल्न सफल भए । उत्कृष्ट आक्रामक ब्याटिङ गरेका भीमले २३ बलमा पाँच चौका र चार छक्कासहित ५५ रन जोडे । १९ बलमा अर्धशतक बनाउँदै उनी यस संस्करणमा सबैभन्दा छिटो ५० रन बनाउन सफल ब्याटर बने । यसअघि यो कीर्तिमान सुदूरपश्चिमका हर्मित सिंहको नाममा थियो ।

मिलिन्द कुमारले १३ रन जोडे भने अन्य ब्याटर दोहोरो अंकमा पुग्न सकेनन्। ओपनर आकाश त्रिपाठी पहिलो नै बलमा गोल्डेन डक बने ।

पोखराका बलरमध्ये धनञ्जय लक्षण सर्वाधिक प्रभावकारी रहे । उनले चार ओभरमा एक मेडनसहित १६ रन खर्चिँदै चार विकेट लिए । कप्तान कुशल भुर्तेलले दुई विकेट लिए भने किरण ठगुन्ना र विपीन खत्रीले समान एक-एक विकेट हात पारे ।

यसअघि लक्ष्यले प्रतियोगितामा छ खेल खेल्दा चार जित र दुई हार व्यहोरेको छ । आजको खेलमा जित निकाल्न सके लक्ष्य प्लेअफमा प्रवेश गर्नेछ । लक्ष्यले यसअघि जनकपुर, लुम्बिनी, चितवन र कर्णालीलाई पराजित गरेको छ भने सुदूरपश्चिम र विराटनगरसँग हार व्यहोरेको थियो ।

पोखराका लागि यो छैटौँ खेल हो । पाँच खेलमा दुई जित र तीन हारसहित पोखरा प्लेअफ आशा जोगाइराख्न मैदान उत्रिएको छ । पोखराले विराटनगर र सुदूरपश्चिमसँग हार ब्यहोर्दै प्रतियोगिता सुरु गरेको थियो भने जनकपुर र कर्णालीलाई पराजित गर्न सफल भएको थियो । लुम्बिनीविरुद्ध भने तीन विकेटको हार खेप्नुपरेको थियो ।