काठमाडौं । कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट रङ्गशालामा जारी नेपाल प्रिमियर लिग (एनपीएल) दोस्रो संस्करण अन्तर्गत आज लिग चरणको अन्तिम खेल हुँदैछ ।
अपराह्न ३:३० बजे निर्धारित खेलमा कर्णाली याक्स र साविक विजेता जनकपुर बोल्ट्स आमनेसामने हुनेछन् । छ खेलबाट समान दुई-दुई अंक जोडेका यी दुवै टोली प्लेअफबाट बाहिरिइसकेकाले आजको भिडन्त प्रतिष्ठामूलक हुनेछ । कर्णालीको नेतृत्व सोमपाल कामीले गरिरहेका छन् भने जनकपुरका मार्की प्लेयर आशिफ शेख हुन् । जनकपुरले लगातार असफलतापछि कप्तानीमा पटक-पटक परिवर्तन गर्दै आएको छ ।
यसअघि सुदूरपश्चिम रोयल्स र विराटनगर किङ्स क्वालिफायरका लागि छनोट भइसकेका छन् । त्यस्तै काठमाडौं गोर्खाज र लुम्बिनी लायन्सले इलिमिनेटरमा स्थान सुरक्षित गरिसकेका छन् ।
एनपीएल दोस्रो संस्करणका सबै खेलहरू कीर्तिपुरस्थित त्रिवि मैदानमा दिउँसो र राति गरी भइरहेका छन् । नेपाल क्रिकेट सङ्घ (क्यान)ले प्रत्येक खेलका लागि ९ हजार ४५० टिकट बिक्री गर्दै आएको छ। मंसिर १ गतेदेखि सुरु भएको प्रतियोगिता मंसिर २७ गतेसम्म सञ्चालन हुने कार्यक्रम छ ।
प्रतिक्रिया