बुटवल । एनसेल आजियाटा लिमिटेडले एक सेवाग्राहीको नाम र इ-सिम दुरुपयोग गरी बैंक खाताबाट अनधिकृत रूपमा रकम ट्रान्सफर भएको घटनाप्रति गम्भीर ध्यानाकर्षण भएको जनाएको छ । कम्पनीले सोमबार सार्वजनिक गरेको जानकारीका अनुसार ईमेलमार्फत प्राप्त आधिकारिक परिचयपत्र तथा आवश्यक कागजातहरूका आधारमा पूरा प्रक्रिया अपनाएर मात्र सम्बद्ध सेवाग्राहीलाई इ-सिम जारी गरिएको जनाएको छ ।
एनसेलले उक्त घटनामा आफ्नो कमजोरी नभएको दाबी गर्दै, कागजात प्रमाणीकरणदेखि इ-सिम सक्रियता प्रक्रियासम्म सबै चरण नियमसम्मत ढंगले पूरा गरिएको स्पष्ट पारेको छ ।
घटनापछि पीडितले मुद्दा दर्ता गरेसँगै इलाका प्रहरी कार्यालय बुटवल, रूपन्देहीले आवश्यक अनुसन्धान सुरु गरिसकेको छ । एनसेलले अनुसन्धान प्रकृयामा पूर्ण सहयोग गर्न आफू तत्पर रहेको बताउँदै दोषीलाई कानूनी दायरामा ल्याउने कार्यमा राज्यका निकायसँग समन्वय गरिने जनाएको छ ।
कम्पनीले ग्राहक सुरक्षालाई प्राथमिकता दिने बताउँदै भविष्यमा यस्ता घटना दोहोरिन नदिन आवश्यक आन्तरिक समीक्षा र सुरक्षा प्रणालीसहितका कदम उठाइने संकेत पनि गरेको छ ।
प्रतिक्रिया