काठमाडौं । तामझामका साथ गरिएको बिधान महाधिवेशन सकिएको ३ महिना पूरा नहुँदै नेकपा एमालेले विधान महाधिवेशनका अधिकांस निर्णयहरु उल्ट्याएको छ । एमालेको आज बसेको केन्द्रीय समितिको बैठकले नेताहरुकै विरोधका बीच एमाले विधान महाधिवेशनको निर्णय उल्ट्याएको हो ।
बैठकले विधान महाधिवेशनको निर्णय उल्ट्याउँदै पदाधिकारी र स्थायी कमिटीको संख्या पुरानै कायम गरेको छ । विधान महाधिवेशनले पदाधिकारीको संख्या १५ र स्थायी कमिटी नरहने व्यवस्था गरेको थियो ।
अध्यक्ष केपी शर्मा ओलीको प्रस्तावमा केन्द्रीय कमिटीको आकार बढाउने देखि स्थायी समिति र पोलिटव्युरो बनाउने सम्मको निर्णय केन्द्रीय कमिटीले गरेको छ । नयाँ निर्णय अनुसार अध्यक्ष एक, उपाध्यक्ष ५, सचिव ९, महासचिव १, उपमहासचिव ३ बनाइएको छ । यसैगरी ४५ सदस्यीय स्थायी कमिटी र ९९ सदस्यीय पोलिटव्युरो बनाइएको छ । यसरी जम्मा केन्द्रीय कमिटीलाई विधान महाधिवेन पूर्व रहेकै संख्या ३०१ सदस्यीय बनेको छ ।
गत भदौमा मात्र भएको विधान महाधिवेशनबाट ३०१ सदस्यीय केन्द्रीय समितिको संख्या घटाएर २५१ सदस्यीय बनाइएको थियो । विधान महाधिवेशनबाट टुंगो लगाइसकेको विषयलाई फेरि संशोधन गर्न खोजिएको भन्दै कतिपय केन्द्रीय सदस्यहरुले विरोध जनाएका थिए ।
बैठकमा एमाले बरिष्ठ उपाध्यक्ष ईश्वर पोखरेलले वर्तमान परिस्थितिले केन्द्रीय समितिको संख्या बढाउन नभनेको बताएका थिए । उनले संख्या बढाउँदैमा एमालेको क्षमता बढ्ने के ग्यारेन्टी छ ? भन्दै प्रश्न समेत गरेको बैठकमा सहभागी एक नेताले बताए । पोखरेलले दुई कार्यकालको ब्यवस्था पनि उल्ट्याउने प्रस्ताव किन नआएको भन्ने प्रश्न पनि गरे ।
प्रतिक्रिया