काठमाडौं । नेकपा (एमाले)को ११ औँ राष्ट्रिय महाधिवेशनबाट निर्वाचित नयाँ केन्द्रीय कमिटीको पहिलो बैठक आज बस्दैछ । महाधिवेशन सम्पन्न भएपछि पहिलो पटक बस्न लागेको केन्द्रीय कमिटी बैठक शुक्रबार दिउँसो १ बजे बबरमहलस्थित कार्की ब्याङ्केटमा आयोजना हुने भएको छ ।
भक्तपुरमा मंसिर २७ गते उद्घाटन भई सुरु भएको एमालेको ११औँ महाधिवेशन पुस ३ गते बिहीबार नयाँ नेतृत्व चयन गर्दै औपचारिक रूपमा सम्पन्न भएको थियो । महाधिवेशनले केपी शर्मा ओलीको अध्यक्षतामा ३०१ सदस्यीय नयाँ केन्द्रीय कमिटी निर्वाचित गरेको छ ।
आजको बैठकमा पार्टीको आगामी राजनीतिक तथा संगठनात्मक कार्यदिशाबारे छलफल हुने जनाइएको छ । साथै पोलिटब्यूरो र स्थायी कमिटी गठन, जिम्मेवारी बाँडफाँट तथा पार्टी सञ्चालनका प्राथमिक एजेन्डामाथि गम्भीर विमर्श हुने अपेक्षा गरिएको छ ।
महाधिवेशनपछिको पहिलो केन्द्रीय कमिटी बैठक भएकाले यसले एमालेको भावी रणनीति, संगठन सुदृढीकरण र राजनीतिक गतिविधिको दिशा निर्धारण गर्ने महत्वपूर्ण निर्णयहरू लिने विश्वास गरिएको छ ।
प्रतिक्रिया