काठमाडौं । सरकारको कार्यशैली र उपलब्धिप्रति असन्तुष्टि जनाउँदै जेनजी समूहले आजदेखि विरोध प्रदर्शन सुरु गर्ने भएको छ । जेनजी समूहका अनुसार आइतबार बिहान ११ बजेदेखि काठमाडौंको माइतीघर मण्डलामा शान्तिपूर्ण प्रदर्शन गरिनेछ ।
आन्दोलनका बारेमा जेनजी अगुवा मिराज ढुंगानाले समूह कुनै पनि व्यक्ति वा शक्तिबाट परिचालित नभएको स्पष्ट पारेका छन् । उनले भने, “हामी कोही कसैबाट परिचालित भएका छैनौँ । सुरुआती दिनदेखि नै हाम्रा मागहरू स्पष्ट छन् र ती फेरिएका पनि छैनन् । हाम्रो आन्दोलन पूर्ण रूपमा शान्तिपूर्ण हुन्छ ।”
प्रधानमन्त्री सुशीला कार्की नेतृत्वको सरकारको १०० दिनको कार्यकाल पूरा भएकै दिन विभिन्न जेनजी समूहहरूले आन्दोलनको घोषणा गरेका हुन् । जेनजी समूहले सरकारको १०० दिनको कामलाई असफल ठहर गर्दै आफ्ना माग र मुद्दाहरू सरकारले ‘अपहरण’ गरेको आरोप लगाएका छन् ।
जेनजी समूहका अनुसार वर्तमान सरकारले भदौ २३ र २४ गते भएको आन्दोलनको मर्म र भावनालाई आत्मसात गर्न नसकेको छ । “सरकार हाइज्याक भएको छ, सरकार अपहरणमा परेको छ,” ढुंगानाले भने, “हाम्रो आन्दोलन जेनजीका माग पूरा नगरी सरकारले अघि सारेको चुनावी प्रवृत्तिका विरुद्ध हो । आन्दोलनको अग्रपंक्तिमा म स्वयं खटिन्छु ।”
प्रधानमन्त्रीको राजीनामा माग गर्दै गरिखान देउ, जेनजी मुभमेन्ट नेपाल, जेनजी नेसनल फ्रन्ट, जेनजी स्पार्क, एन-टेक जेनजी, जेनजी पार्लियामेन्ट, जीबीबी समूह, जेवाईएन समूह, जेनजी युनाइटेड, स्वतन्त्र जेनजी नेपाल, डिजिटल टास्कफोर्स जेनजीलगायत ३० भन्दा बढी जेनजी समूह आन्दोलनमा सहभागी हुने जनाइएको छ । यस्तै, अल-नेसन जेनजी, जेनजी एकता मञ्च र समता जेनजीले पनि प्रधानमन्त्रीको राजीनामाको माग गरेका छन् ।
विभिन्न जेनजी समूहहरूको संयोजकको जिम्मेवारी मिराज ढुंगानालाई दिइएको छ । उनी गरिखान देउ अभियानका समेत संयोजक हुन् । जेनजी समूहले आफ्ना माग पूरा नभएसम्म आन्दोलनलाई निरन्तरता दिने चेतावनी दिएको छ ।
प्रतिक्रिया