दाङ । पूर्व—पश्चिम राजमार्ग अन्तर्गत दाङको लमही– भालुबाङ सडक खण्डमा बिना इजाजत(अनुमति) सडक किनारका रुख कटान गरेको मुद्दामा दाङको राप्ती गाउँपालिकाका अध्यक्षसहित २ जना वडा अध्यक्षलाई १५ दिन कैद सजायको फैसला भएको छ । दाङ जिल्ला अदालतले दुई वर्ष अघिको मुद्दाको सुनवाइ गर्दै पालिका अध्यक्ष र ३ जना वडा अध्यक्षसहित ८ जनालाई दोषी ठहर गरेको छ।
दाङ जिल्ला अदालतले दुई वर्ष अघिको मुद्दाको सुनवाइ गर्दै राप्ती गाउँपालिकाका अध्यक्ष प्रकाश विष्टसहित १ नम्बर वडा अध्यक्ष गेमे खड्का, ५ नम्बर वडा अध्यक्ष देवप्रसाद चौधरी, काठ खरिद गर्ने झविन्द्र भण्डारी, अभियान चौधरी, नन्दु गिरी र केशरबहादुर चौधरीलाई १५–१५ दिनको कैद सजायको फैसला सुनाएको छ भने राप्ती गाउँपालिका–४ का वडा अध्यक्ष वीर बहादुर चौधरीलाई १ महिना कैद र १ लाख ४१ हजार २ सय २६ रुपैयाँ बिगो भराउने आदेश भएको छ।
राप्ती गाउँपालिकाका अध्यक्षविष्ट, ३ जना वडा अध्यक्षसहित ८ जनालाई जिल्ला न्यायाधीश राजेश्वर अर्यालको एकल इजलासले दोषी ठहर गरेको अदालतका सूचना अधिकारी गोकर्ण वलीले जानकारी दिए।
सूचना अधिकारी वलीका अनुसार गाउँपालिकाका अध्यक्ष विष्ट समेत ९ जनाविरुद्ध ‘बिना इजाजत प्रमाण बेगर सडक क्षेत्राधिकार भित्रको रुख काटी काठ ओसारपसार गरेको’ मुद्दामा ८ जना विरुद्ध आंशिक अभियोग दाबी पुग्ने अदालतले ठहर गरेको हो ।
अदालतले तत्कालीन सडक डिभिजन कार्यालय दाङका प्रमुख रामपुकार जैसवाललाई भने सफाइ दिएको छ। २०८० मंसिर १० गते डिभिजन वन कार्यालय लमही, देउखुरीको जाहेरी प्रतिवेदनका आधारमा मुद्दा परेको थियो।
विष्ट तत्कालीन नेकपा (माओवादी केन्द्र)बाट राप्ती गाउँपालिकाको अध्यक्षमा निर्वाचित भएका हुन् । विष्टसहितको समूहले भालुवाङदेखि सिंगेखोला सम्म पूर्व–पश्चिमको दायाँ र बायाँ रहेका रुखहरू बिना अनुमति काटेर ओसारपसार गरेको आरोपमा डिभिजन वन कार्यालय लमहीको तर्फबाट दाङ जिल्ला अदालतमा मुद्दा दर्ता भएको थियो।
प्रतिक्रिया