काठमाडौं । नेपाली कांग्रेसको केन्द्रीय कार्यसम्पादन समितिको बैठक आज पनि बस्ने भएको छ । केही दिनदेखि निरन्तर चलिरहेको बैठक आज दिउँसो १ बजे पार्टी केन्द्रीय कार्यालय सानेपामा सुरु हुने पार्टीले जनाएको छ ।
बैठकमा मुख्यतः पार्टीको महाधिवेशन, संगठन सुदृढीकरण तथा समसामयिक राजनीतिक विषयमा छलफल भइरहेको छ । यसअघि शुक्रबार बसेको बैठकमा नेताहरूले महाधिवेशनको तयारी, सम्भावित मिति र प्रक्रिया सम्बन्धी आ-आफ्नो धारणा राखेका थिए । धेरै नेताहरूले तोकिएको समयमा नियमित महाधिवेशन गर्न कठिन देखिएकाले विशेष महाधिवेशनको विकल्पबारे गम्भीर छलफल आवश्यक रहेको बताएका थिए ।
यसैबीच, विशेष महाधिवेशनको माग गर्दै केही नेता तथा कार्यकर्ताहरूले पार्टी नेतृत्वलाई औपचारिक रूपमा स्मरणपत्र बुझाएका छन् । उनीहरूले पार्टीभित्र देखिएको अन्योल र सांगठनिक जटिलता समाधानका लागि विशेष महाधिवेशन अपरिहार्य भएको दाबी गरेका छन् । स्मरणपत्र पार्टी केन्द्रीय कार्यालय पुगेर महामन्त्रीद्वय गगन थापा र विश्वप्रकाश शर्मालाई बोधार्थ गराउँदै मुख्यसचिव कृष्णप्रसाद पौडेललाई बुझाइएको हो ।
पार्टीभित्र महाधिवेशनको समय, विधि र प्रक्रियालाई लिएर मतभेद देखिँदै आएको छ । केही नेताहरू नियमित महाधिवेशनमै जोड दिइरहेका छन् भने अर्काे समूहले विशेष महाधिवेशनमार्फत संगठनलाई पुनर्संरचना गर्नुपर्ने तर्क अघि सारेको छ । आजको बैठकमा यी विषयमा थप गम्भीर छलफल हुने र आगामी कार्यदिशा तय हुने अपेक्षा गरिएको छ ।
प्रतिक्रिया