काठमाडौं । नेपाली क्रिकेटका अनुभवी प्रशिक्षक तथा पूर्व राष्ट्रिय खेलाडी जगत टमाटा राष्ट्रिय खेलकुद परिषद् (राखेप) को सदस्यमा नियुक्त भएका छन् । खेलकुद क्षेत्रमा लामो समयदेखि योगदान पुर्याउँदै आएका टमाटालाई सरकारको निर्णयअनुसार राखेपको सदस्यमा मनोनयन गरिएको हो ।
टमाटा हाल नेपाल प्रिमियर लिग (एनपीएल) अन्तर्गत सुदूरपश्चिम रोयल्सका मुख्य प्रशिक्षकका रूपमा कार्यरत छन् । उनको प्रशिक्षणमा सुदूरपश्चिम रोयल्स लगातार दुई सिजन उपविजेता बन्न सफल भएको थियो । खेलाडी र प्रशिक्षक दुवै हैसियतमा उल्लेखनीय योगदान दिएका टमाटा नेपाली क्रिकेट वृत्तमा अनुभवी र सम्मानित व्यक्तित्वका रूपमा परिचित छन् ।
राष्ट्रिय टोलीका पूर्व खेलाडीसमेत रहेका टमाटाले क्रिकेट खेलाडी उत्पादन, प्रशिक्षक विकास र संरचनागत सुधारमा निरन्तर योगदान दिँदै आएका छन् । अब उनी राष्ट्रिय खेलकुद परिषद्को सदस्यका रूपमा नीति निर्माण, खेल विकास र व्यवस्थापनमा भूमिका खेल्नेछन् ।
टमाटाको नियुक्तिसँगै नेपाली क्रिकेट तथा समग्र खेलकुद क्षेत्रको विकासमा सकारात्मक प्रभाव पर्ने अपेक्षा गरिएको छ ।
प्रतिक्रिया