काठमाडौं । काठमाडौं उपत्यकासहित देशभर तापक्रम क्रमिक रूपमा घटिरहेको छ । मौसम पूर्वानुमान महाशाखाका अनुसार बिहीबार पुस १७ गते बिहान पौने ९ बजे काठमाडौंको न्यूनतम तापक्रम ४.६ डिग्री सेल्सियस मापन गरिएको छ, जुन यस वर्षकै सबैभन्दा कम हो ।
महाशाखाले आउँदा दिनहरूमा तापक्रम अझै घट्ने सम्भावना रहेको जनाएको छ । यसअघि बुधबार हिजो काठमाडौंको न्यूनतम तापक्रम ४.९ र मंगलबार पुस १५ गते ४.८ डिग्री सेल्सियस मापन गरिएको थियो ।
काठमाडौंमा हालसम्मकै सबैभन्दा कम तापक्रम सन् १९७८ जनवरी ११ मा –३.५ डिग्री सेल्सियस मापन गरिएको थियो ।
महाशाखाका अनुसार जुम्लामा सबैभन्दा कम न्यूनतम तापक्रम मापन भएको छ । बिहीबार जुम्लाको न्यूनतम तापक्रम –४.१ डिग्री सेल्सियस रहेको छ ।
हाल देशभर पश्चिमी वायुको आंशिक प्रभाव रहेको छ । तराईका भूभागमा हुस्सु र कुहिरोका कारण दैनिक जनजीवन, स्वास्थ्य तथा सडक यातायातमा आंशिक असर पर्न सक्ने भएकाले दैनिक मौसमी अद्यावधिक सूचना लिन महाशाखाले अनुरोध गरेको छ ।
महाशाखाका अनुसार हरेक दिन बिहान पौने ९ बजे न्यूनतम र बेलुका पौने ६ बजे अधिकतम तापक्रम मापन गरी वेबसाइटमार्फत सार्वजनिक गरिँदै आएको छ ।
प्रतिक्रिया