गुल्मी । गुल्मीको मालिका गाउँपालिकामा भएको सवारी दुर्घटनामा दुई जनाको ज्यान गएको छ भने दुई जना घाइते भएका छन् । मालिका गाउँपालिका-७ अर्जे राम्चेमा विद्यार्थी बोकेर वनभोज जाँदै गरेको बसले विपरीत दिशाबाट आउँदै गरेको मोटरसाइकललाई ठक्कर दिँदा मोटरसाइकलमा सवार दुई जनाको घटनास्थलमै मृत्यु भएको हो ।
दुर्घटनामा ज्यान गुमाउनेमा मालिका-६ का ३६ वर्षीय बसन्त अर्याल र ६० वर्षीया मनकला अर्याल रहेका छन् । जिल्ला प्रहरी कार्यालय गुल्मीका अनुसार लुम्बिनी प्रदेश ००-ख-०३५५ नम्बरको बसले लु ९ प ८१५० नम्बरको मोटरसाइकललाई ठक्कर दिएको थियो ।
दुर्घटनामा मोटरसाइकलमा सवार ५ वर्षीय बालक अनुभव गिरी र पैदल हिँडिरहेकी मालिका-६ की स्थानीय शिक्षिका लिला अर्याल घाइते भएका छन् । दुवैको उपचार भइरहेको र अवस्था सामान्य रहेको प्रहरीले जनाएको छ ।
प्रहरीका अनुसार दुर्घटना मालिका-७ अर्जे राम्चे ओरालो सडक खण्डमा भएको हो । बस स्थानीय सिद्ध इङ्लिस बोर्डिङ स्कुलका विद्यार्थीहरूलाई वनभोजका लागि लैजाँदै थियो ।
दुर्घटनाको कारण खुल्न नसकेको र घटनाबारे थप अनुसन्धान भइरहेको जिल्ला प्रहरी कार्यालय गुल्मीका प्रमुख प्रहरी नायब उपरीक्षक नारायणप्रसाद अधिकारीले जानकारी दिए ।
प्रतिक्रिया