उदयपुर केन्द्रविन्दु भएर ४.३ म्याग्निच्युडको भूकम्प

काठमाडौं । उदयपुर जिल्लामा शनिबार राति भूकम्प गएको छ । राष्ट्रिय भूकम्प मापन तथा अनुसन्धान केन्द्रका अनुसार शनिबार बेलुका १० बजेर ५१ मिनेट जाँदा उदयपुरको बागपाटी आसपास केन्द्रविन्दु भएर ४.३ म्याग्निच्युडको भूकम्प गएको हो ।

भूकम्पको धक्का उदयपुरसहित आसपासका जिल्लामा पनि महसुस गरिएको स्थानीयले बताएका छन् । हालसम्म भूकम्पबाट मानवीय तथा भौतिक क्षतिको विवरण प्राप्त नभएको केन्द्रले जनाएको छ । सम्बन्धित निकायहरूले सम्भावित क्षतिको विवरण संकलन गर्ने काम भइरहेको जानकारी दिएका छन् ।

यसअघि शनिबार नै ताप्लेजुङ जिल्लाको फलैँचा आसपास केन्द्रविन्दु बनाएर ४.६ म्याग्निच्युडको भूकम्प गएको थियो । केही घण्टाको अन्तरालमै दुई स्थानमा भूकम्प गएकोले स्थानीयवासीमा त्रासको वातावरण सिर्जना भएको छ ।

भूकम्प मापन केन्द्रका अनुसार नेपाल भूकम्पीय जोखिमयुक्त क्षेत्रमा पर्ने भएकाले यस्ता मध्यम खालका भूकम्पहरू समय-समयमा जाने गरेका छन् । केन्द्रले भूकम्पका बेला सतर्कता अपनाउन, सुरक्षित स्थानमा बस्न र अफवाहमा नपर्न सर्वसाधारणलाई आग्रह गरेको छ ।