नेपालगन्ज । बाँके प्रहरीले बाँकेको कोहलपुर र खजुराबाट लागु औषधका कारोबारेहरुलाई पक्राउ गरेको छ । प्रहरी पक्राउ गरेका कारोबारेमा एकाघरका श्रीमान श्रीमती समेत रहेका छन् ।
प्रहरीका अनुसार कोहलपुर नगरपालिका–११ बाट अवैध लागुऔषध ब्राउनसुगर सहित श्रीमान श्रीमती पक्राउ परेका हुन् । ६ ग्राम ३५० मिलिग्राम र नगद ८९ हजार ९ सय रुपैयाँसहित पक्राउ पर्नेहरूमा कोहलपुर–११ मा डेरा गरी बस्ने कालिकोटको रास्कोट नगरपालिका–५ घर भएका २३ वर्षीय मुकेश बम र उनकी २० वर्षीया श्रीमती कृपा तामाङ रहेका छन् ।
उनीहरू बस्दै आएको कोठा तलासी गर्ने क्रममा इलाका प्रहरी कार्यालय कोहलपुरबाट खटिएको प्रहरी टोलीले ब्राउनसुगर र नगद रकम बरामद गरेको जिल्ला प्रहरी कार्यालयले जानकारी दिएको छ ।
यसैगरी प्रहरीले बाँकेको खजुराबाट पनि ब्राउनसुगर सहित १ जनालाई पक्राउ गरेको छ । खजुरा–७ गुनाहाना चोकबाट अवैध लागुऔषध ब्राउनसुगर १ सय १० मिलिग्रामसहित सोही स्थानका ४७ वर्षीय समि उल्ला भाटलाई प्रहरीले पक्राउ गरेको हो । इलाका प्रहरी कार्यालय धनौलीबाट खटिएको प्रहरी टोलीले उनलाई ब्राउनसुगरसहित नियन्त्रणमा लिएको प्रहरीले जनाएको छ ।
पक्राउ परेकामाथि थप अनुसन्धान भइरहेको जिल्ला प्रहरी कार्यालय बाँकेले जनाएको छ ।
प्रतिक्रिया