काठमाडौं । सशस्त्र प्रहरीले दुई करोड रुपैयाँभन्दा बढी मूल्यका इलेक्ट्रिक चुरोट (भेप) बोकेको कन्टेनरसहित एक जनालाई पक्राउ गरेको छ । सोमबार मुस्ताङको लोमन्थाङ गाउँपालिका-४, नेचुङ क्षेत्रमा अवैध रूपमा भेप ओसारपसार भइरहेको सूचनाका आधारमा गरिएको कारबाहीका क्रममा उनी पक्राउ परेका हुन् ।
सशस्त्र प्रहरी बलका सहप्रवक्ता तथा डीएसपी शैलेन्द्र थापाका अनुसार सिन्धुपाल्चोकको सुनकोसी गाउँपालिका-५ घर भएका ३२ वर्षीय पेमा लामालाई दुई करोड २४ लाख ५९ हजार ३२० रुपैयाँ बराबरको इलेक्ट्रिक चुरोटसहित नियन्त्रणमा लिइएको हो । लामा ना ६ ख ७५९१ नम्बरको कन्टेनरका चालक रहेको प्रहरीले जनाएको छ ।
प्रहरीका अनुसार केही दिनअघि चीनबाट अवैध रूपमा ल्याइएका इलेक्ट्रिक चुरोट कोरोला नाकाअगाडि उक्त कन्टेनरमा लोड गरी राखिएको अवस्थामा फेला परेको थियो । कन्टेनरभित्र ८० कार्टुन इलेक्ट्रिक चुरोट बरामद गरिएको सशस्त्र प्रहरीले जनाएको छ ।
बरामद गरिएका सबै इलेक्ट्रिक चुरोट मुस्ताङ भन्सार कार्यालयमा बुझाइएको छ भने पक्राउ परेका लामा आवश्यक कानुनी कारबाहीका लागि इलाका प्रहरी कार्यालय छोसेरमा बुझाइएको सहप्रवक्ता थापाले जानकारी दिए ।
सशस्त्र प्रहरीले कन्टेनर बिग्रिएको अवस्थामा रहेको र त्यसमा रहेको टिस्यु तथा ट्वाइलेट पेपर भने सोही स्थानमै भन्सार कार्यालयको सिलबन्दीमा राखिएको जनाएको छ । अवैध रूपमा भन्सार छल्ने प्रयास भएको आशंकामा घटनाबारे थप अनुसन्धान भइरहेको सशस्त्र प्रहरीले जनाएको छ ।
प्रतिक्रिया