दाङ । माघे संक्रान्ती तथा थारु समुदायको महान् पर्व माघको अवसरमा लुम्बिनी प्रदेश सरकारले आज प्रदेशभर सार्वजनिक बिदा दिएको छ । शुक्रबार परेको माघे संक्रान्ती र माघ पर्वलाई लक्षित गर्दै प्रदेश सरकारले सार्वजनिक बिदा दिएको हो ।
लुम्बिनी प्रदेश राजपत्रमा २०८१ चैत २१ गते प्रकाशित सार्वजनिक सूचनाअनुसार माघे संक्रान्ती तथा माघ पर्वको अवसरमा प्रदेशभर सार्वजनिक बिदा दिने निर्णय यसअघि नै गरिएको थियो । सोही निर्णयअनुसार आज प्रदेशका सबै सरकारी कार्यालय, सार्वजनिक संघ-संस्था, विद्यालय तथा स्थानीय तहका कार्यालयहरूमा सार्वजनिक बिदा दिइएको आन्तरिक मामिला तथा कानुन मन्त्रालयका सचिव लोकबहादुर सुनारले जानकारी दिए ।
माघे संक्रान्तीलाई सूर्य उत्तरायण प्रवेश गर्ने दिनका रूपमा मनाइन्छ भने थारु समुदायका लागि माघ पर्व नयाँ वर्षको प्रारम्भ र सामाजिक-सांस्कृतिक रूपमा विशेष महत्व बोकेको पर्व हो । यस अवसरमा थारु समुदायले परम्परागत नाचगान, भेषभूषा, भोजभतेर तथा पारिवारिक जमघटसहित पर्व मनाउने गर्दछन् ।
प्रदेश सरकारले सांस्कृतिक विविधता, सामाजिक सद्भाव र समुदायको पहिचान संरक्षणलाई ध्यानमा राख्दै माघे संक्रान्ती तथा माघ पर्वमा सार्वजनिक बिदा दिँदै आएको छ ।
प्रतिक्रिया