प्रचण्डको रुकुम पूर्वमा मोर्निङ वक र घरदैलो अभियान, जनयुद्धकालीन स्थलको अवलोकन गर्दै सहिद परिवारसँग भेट

रुकुमपूर्व । पूर्वी रुकुमबाट प्रतिनिधिसभा निर्वाचनका लागि मनोनयन दर्ता गराएका नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले आज रुकुम पूर्वमा मोर्निङ वक गर्दै चुनावी गतिविधि सुरु गरेका छन् ।

मोर्निङ वकका क्रममा संयोजक प्रचण्डले जनयुद्धका बेला ऐतिहासिक रूपमा रुकुमकोट प्रहरी चौकी कब्जा गरिएको स्थलको अवलोकन गरेका छन् । हाल उक्त स्थानमा युद्ध संग्रहालय निर्माण गरिएको छ । अवलोकनका क्रममा उनले जनयुद्धसँग जोडिएका ऐतिहासिक स्थललाई अझ व्यवस्थित र संरक्षणयोग्य बनाइने प्रतिबद्धता व्यक्त गरेका छन् ।

मोर्निङ वकपछि संयोजक प्रचण्डले रुकुम पूर्वका विभिन्न स्थानमा घरदैलो अभियानको औपचारिक सुरुवात गरेका छन् । घरदैलोका क्रममा उनले सहिद सिता घर्तीमगरकी आमा, सहिद जीवन काजीकी आमालगायत विभिन्न सहिद परिवारका सदस्यहरूसँग भेटघाट तथा संवाद गरेका थिए ।

सहिद परिवारसँगको भेटमा उनले जनयुद्धका सहिदहरूको सपना आफूले नबिर्सिएको उल्लेख गर्दै उनीहरूको सम्मान र अधिकार सुनिश्चित गर्न राज्यस्तरबाट पहल गरिएको बताए । उनले जनयुद्धका सहिदहरूको सम्मानमा सरकारले थालनी गरेका कामहरू अझ सुदृढ बनाउँदै थप अधिकार स्थापित गर्न आफू निरन्तर सक्रिय रहेको स्पष्ट पारे ।

संयोजक प्रचण्डले आफू सरकारमा रहँदा जनयुद्धका सहिदहरूको नाम राष्ट्रिय रूपमा राजपत्रमा प्रकाशित गरिएको, सहिद परिवारका सदस्यलाई रोजगारी तथा विभिन्न अवसर उपलब्ध गराउने कार्यविधि तयार गरिएको जानकारी पनि दिए ।

मोर्निङ वक र घरदैलो अभियानकै क्रममा उनले रुकुम पूर्वका पुराना कम्युनिष्ट नेता, कार्यकर्ता तथा स्थानीय सर्वसाधारणसँग प्रत्यक्ष भेटघाट गर्दै नेपाली कम्युनिष्ट पार्टीको पक्षमा मतदान गर्न आग्रह गरेका छन् । स्थानीय जनतासँगको संवादमा उनले जनताको भावना र अपेक्षाअनुसार काम गर्ने प्रतिबद्धता समेत व्यक्त गरेका छन् ।