काठमाडौं । राष्ट्रिय मानव अधिकार आयोगले बढ्दो घृणाजन्य अभिव्यक्ति प्रति गम्भीर ध्यानाकर्षण गराउँदै यस्ता गतिविधि तत्काल रोक्न सबै सम्बन्धित पक्षलाई आग्रह गरेको छ ।
आयोगले आसन्न प्रतिनिधिसभा सदस्य निर्वाचनलाई लक्षित गर्दै शान्ति सुरक्षा अझ सुदृढ बनाउन आयोगले सरकारलाई निर्देशन दिएको छ ।
निर्वाचन नजिकिँदै जाँदा घृणाजन्य अभिव्यक्ति बढ्दै गएको आयोगको ठहर छ । आयोगका प्रवक्ता डा। टीकाराम पोखरेलद्वारा मंगलबार जारी विज्ञप्तिमा घृणाजन्य अभिव्यक्तिले अराजकता बढाउने र निर्वाचनको समयमा शान्ति सुरक्षामा प्रत्यक्ष असर पार्ने जोखिम रहेको उल्लेख गरिएको छ ।
आयोगका अनुसार पछिल्ला दिनहरूमा विभिन्न राजनीतिक दलका जिम्मेवार व्यक्तिहरूबाट एक–अर्कामाथि लक्षित आक्षेप, अमर्यादित आरोप–प्रत्यारोप तथा घृणायुक्त अभिव्यक्तिहरू सार्वजनिक रूपमा व्यक्त भइरहेका छन् ।
संविधान तथा मानव अधिकारसम्बन्धी अन्तर्राष्ट्रिय कानुनले अभिव्यक्ति र विचारको स्वतन्त्रताको संरक्षण गरे पनि अरूको गरिमा, मर्यादा र सामाजिक सद्भावमा आँच पुग्ने गतिविधिलाई अभिव्यक्ति स्वतन्त्रताको नाममा स्वीकार गर्न नसकिने आयोगको स्पष्ट धारणा छ ।
आयोगले संविधान, प्रचलित कानुन तथा अन्तर्राष्ट्रिय मानव अधिकारका मूल्य–मान्यताविपरीत घृणाजन्य अभिव्यक्ति नदिन, सामाजिक सञ्जाल प्रयोग गर्दा शिष्टता र मर्यादाको पालना गर्न सबैलाई आग्रह गरेको छ ।
विज्ञप्तिमा राजनीतिक दलका नेता, उम्मेदवार तथा सर्वसाधारणलाई घृणायुक्त अभिव्यक्तिको प्रचार–प्रसार नगर्न र निर्वाचन आचारसंहिताको पूर्ण रूपमा पालना गर्न विशेष अनुरोध गरिएको छ । यस्ता अभिव्यक्तिले समाजमा घृणा फैलाउनुका साथै शान्ति सुरक्षामा गम्भीर चुनौती सिर्जना गर्न सक्ने आयोगले चेतावनी दिएको छ ।
प्रतिक्रिया