काठमाडौं । नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरीको अन्तर्राष्ट्रिय वरीयतामा उल्लेखनीय सुधार आएको छ । अन्तर्राष्ट्रिय क्रिकेट काउन्सिल (आईसीसी) ले बुधबार सार्वजनिक गरेको टी-२० तर्फको पुरुष अलराउन्डर वरीयतामा ऐरी दुई स्थान उक्लँदै छैटौँ स्थानमा पुगेका छन् ।
यसअघि आठौँ स्थानमा रहेका ऐरी हालैका अन्तर्राष्ट्रिय प्रदर्शनको प्रभावस्वरूप वरीयता सुधार गर्न सफल भएका हुन् । ऐरीको यो उपलब्धिलाई नेपाली क्रिकेटका लागि महत्वपूर्ण प्रगतिको रूपमा हेरिएको छ ।
आईसीसीको अद्यावधिक वरीयताअनुसार जिम्बाब्वेका कप्तान सिकन्दर राजा शीर्ष स्थानमा यथावत् छन् । त्यस्तै, पाकिस्तानका अलराउन्डर सैम अयुवले दोस्रो स्थानमा आफ्नो वरीयता कायम राखेका छन् ।
भारतका स्टार अलराउन्डर हार्दिक पान्ड्याले एक स्थान सुधार गर्दै तेस्रो स्थानमा उक्लिएका छन् । यसअघि तेस्रो स्थानमा रहेका वेस्ट इन्डिजका रोस्टन चेज एक स्थान घट्दै चौथो स्थानमा झरेका छन् । पाकिस्तानका मोहम्मद नवाज पाँचौँ स्थानमा यथावत् रहेका छन् ।
दीपेन्द्रसिंह ऐरीको वरीयतामा आएको यो सुधारले नेपाली क्रिकेट खेलाडीहरू अन्तर्राष्ट्रिय स्तरमा प्रतिस्पर्धी बन्दै गएको संकेत गरेको छ ।
प्रतिक्रिया