काठमाडौं । नेपाल कम्युनिष्ट पार्टी (एमाले) ले आगामी फागुन २१ गते हुने निर्वाचनको प्रचार-प्रसारका क्रममा सामाजिक सञ्जालको बढ्दो दुरुपयोगप्रति गम्भीर चिन्ता व्यक्त गरेको छ । कलाकारको प्रयोग र प्रविधिको दुरुपयोगमार्फत पार्टी नेतृत्व, नीति तथा निर्वाचन चिह्नबारे भ्रम फैलाउने प्रयास भइरहेको एमालेको आरोप छ ।
एमालेले यस्ता गतिविधिमा संलग्न जो-कोहीलाई कानुनी दायरामा ल्याउन सरकारसँग माग गरेको छ । पार्टी अध्यक्ष तथा पूर्वप्रधानमन्त्री केपी शर्मा ओलीविरुद्ध लक्षित गालीगलौज, अमर्यादित र असभ्य अभिव्यक्तिप्रति कडा आपत्ति जनाउँदै एमालेले त्यस्ता गतिविधि तत्काल रोक्न आग्रह गरेको छ ।
पार्टीले मुलुकको शान्ति-सुरक्षाको अवस्थाप्रति पनि गहिरो चिन्ता व्यक्त गरेको छ । फरार कैदीबन्दी, अवैध हातहतियारको प्रयोग, राजधानीमा बढ्दो लुटपाटका घटना तथा बाराको परवानीपुरमा भएको हत्याकाण्डले भयरहित र निर्भिक रूपमा मतदान गर्ने वातावरण अझै तयार नभएको एमालेको दाबी छ ।
एमालेका प्रचार संयोजक मीनबहादुर शाहीका अनुसार यस्ता घटनाको शीघ्र छानबिन गरी दोषीलाई कडा कारबाही गर्न र प्रभावकारी सुरक्षा व्यवस्था सुनिश्चित गर्न सरकारसँग माग गरिएको छ ।
निर्वाचन आचारसंहिताको निरन्तर उल्लङ्घन भइरहेको उल्लेख गर्दै एमालेले राष्ट्रिय अखण्डता, सार्वभौमिकता र शान्ति सुरक्षामा खलल पुर्याउने गतिविधिमाथि सम्बन्धित निकायले कडा निगरानी बढाउनुपर्ने बताएको छ । अन्यथा उत्पन्न हुन सक्ने अराजकता, हिंसा र कानुन उल्लङ्घनको सम्पूर्ण जिम्मेवारी सरकार र सम्बन्धित पक्षले लिनुपर्ने चेतावनी पनि एमालेले दिएको छ ।
प्रतिक्रिया