काठमाडौं । आईसीसी टी-२० विश्वकप अन्तर्गत जारी खेलमा नेपालले अहिले इंग्ल्याण्डको सामना गरिरहेको छ । भारतको मुम्बईस्थित वानखेडे रङ्गशालामा भइरहेको खेलमा इंग्ल्याण्डले नेपालसमक्ष १८५ रनको लक्ष्य प्रस्तुत गरेको छ ।
लक्ष्य पछ्याउने क्रममा नेपालले दोस्रो विकेट गुमाएको छ । खेलको ५ ओभर २ बलमा कुशल भुर्तेल आउट भएका हुन् । विल ज्याक्सको बलमा उनले कट एन्ड बोल्ड हुँदै पभेलियन फर्किए ।
आउट हुनुअघि कुशलले १७ बलमा २९ रनको आक्रामक पारी खेले, जसमा आकर्षक सटहरू समावेश थिए ।
यसअघि टस जितेर पहिले ब्याटिङ गरेको इंग्ल्याण्डले निर्धारित २० ओभरमा ७ विकेट गुमाउँदै १८४ रन बनाएको थियो । इंग्ल्याण्डका ज्याकब बेथेलले सर्वाधिक ५५ रन जोडे । उनले ३५ बलमा चार चौका र चार छक्का प्रहार गरे ।
कप्तान ह्यारी ब्रुकले ३२ बलमा चार चौका र तीन छक्काको मद्दतमा ५३ रन बनाए । यस्तै, विल ज्याक्सले १८ बलमा एक चौका र चार छक्कासहित विस्फोटक ३९ रनको अविजित पारी खेले ।
बलिङतर्फ नेपालका नन्दन यादव र दीपेन्द्रसिंह ऐरीले समान दुई–दुई विकेट लिए भने सन्दीप लामिछाने र शेर मल्लले एक–एक विकेट हात पारे ।
नेपालको प्लेइङ–११ मा कुशल भुर्तेल, आसिफ शेख, रोहित पौडेल, दीपेन्द्रसिंह ऐरी, आरिफ शेख, लोकेश बम, गुल्शन झा, करण केसी, शेर मल्ल, नन्दन यादव र सन्दीप लामिछाने रहेका छन् ।
त्यसैगरी इंग्ल्याण्डको प्लेइङ–११ मा फिल साल्ट, जोस बटलर, ज्याकब बेथेल, टम ब्यान्टन, ह्यारी ब्रुक, विल ज्याक्स, साम करन, लियाम डसन, आदिल राशिद, जोफ्रा आर्चर र लुक वुड छन् ।
विश्वकपमा नेपाल समूह ‘सी’ मा परेको छ । यस समूहमा नेपालसँगै इंग्ल्याण्ड, वेस्ट इन्डिज, इटाली र स्कटल्यान्ड रहेका छन् ।
प्रतिक्रिया