काठमाडौं । पाकिस्तान–नेपाल मैत्री सम्बन्धलाई थप सुदृढ बनाउने उद्देश्यसहित आयोजित ११औँ संस्करणको पाकिस्तान-नेपाल मैत्री टी-२० क्रिकेट प्रतियोगिता–२०२६ औपचारिक रूपमा सुरु भएको छ।
पाकिस्तानका राजदूत महामहिम अबरार एच हाश्मीले शनिबार प्रतियोगिताको उद्घाटन गरे । उद्घाटन समारोहमा पाकिस्तानका मित्रहरू, खेलप्रेमी, सञ्चारकर्मी, पाकिस्तान–नेपाल एलुमनाइ नेटवर्क, ग्लोबल आइएमई बैंक, क्रिकेट संघ नेपाल तथा युथ काउन्सिलका प्रतिनिधिहरूको उपस्थिति रहेको थियो।
उपस्थित विशिष्ट अतिथिहरूले प्रत्येक वर्ष सफलतापूर्वक प्रतियोगिता आयोजना गर्दै आएकोमा पाकिस्तानी दूतावासको पहलको प्रशंसा गर्दै क्रिकेटले युवाहरूलाई एकताबद्ध गर्ने महत्वपूर्ण भूमिका खेलेको उल्लेख गरे।
यस वर्षको प्रतियोगितामा कुल १२ टोली सहभागी छन्। जसमध्ये १० वटा क्लब टोली, एक टोली पाकिस्तानी दूतावास र एक टोली ग्लोबल आइएमई बैंकको रहेको छ।
उद्घाटन समारोहलाई सम्बोधन गर्दै राजदूत हाश्मीले क्रिकेट केवल खेल मात्र नभई मानिसहरूलाई जोड्ने, आपसी मित्रता, सहकार्य र टोली भावना विकास गर्ने सशक्त माध्यम भएको बताए। उनले सहभागी सबै टोलीलाई रोमाञ्चक खेलको शुभकामना दिँदै प्रतियोगिता सफल बनाउन सहयोग गर्ने आयोजक, साझेदार संस्था तथा उपस्थित अतिथिहरूप्रति धन्यवाद व्यक्त गरे।
टी–२० क्रिकेट प्रतियोगिताको फाइनल तथा पुरस्कार वितरण कार्यक्रम फागनु ३ गते सम्पन्न हुनेछ। प्रतियोगिताका सबै खेलहरू खेलकुद च्यानल ‘एक्सन स्पोर्ट्स एचडीआई’ तथा सामाजिक सञ्जालमार्फत प्रत्यक्ष प्रसारण भइरहेको जनाइएको छ।
प्रतिक्रिया