दुर्घटना अपडेट : तामाकोशी नदीमा बस खस्दा ५ जनाको मृत्यु, ३ घाइतेको उद्धार

रामेछाप । काठमाडौंबाट रामेछाप हुँदै ओखलढुंगा जाँदै गरेको यात्रुवाहक बस तामाकोशी नदीमा खस्दा पाँच जनाको मृत्यु भएको छ ।

रामेछापको मन्थली नगरपालिका–६ भलुवाजोरस्थित त्रिवेणी नजिकै लिलौटी भन्ने स्थानमा यात्रुवाहक बस तामाकोशी नदीमा खस्दा कम्तीमा पाँच जनाको मृत्यु भएको प्रहरीले जनाएको छ ।

बसका साहुसहित पाँच जनाको शव नदीबाट निकालिएको जिल्ला प्रहरी कार्यालय रामेछापका प्रहरी निरीक्षक राजनप्रसाद तिम्सिनाले जनाएका छन्।

दुर्घटनामा परी तीन जना घाइते भएका छन्, उनीहरूलाई उद्धार गरी उपचारका लागि पठाइएको प्रहरीले जनाएको छ ।

काठमाडौंबाट ओखलढुङ्गातर्फ जाँदै गरेको प्रदेश ३–०१–००५ ख ९९७५ नम्बरको अरनिको यातायातको यात्रुवाहक बस सडकबाट सिधै तामाकोशी नदीमा खसेको थियो ।

दुर्घटनापछि स्थानीय बासिन्दा, सुरक्षाकर्मी र उद्धार टोलीको सहयोगमा उद्धार कार्य जारी रहेको छ । नदीमा डुबेको बसबाट अन्य यात्रुहरूलाई निकाल्ने प्रयास भइरहेको प्रहरीले जनाएको छ ।