बुटवल । उमेर समूहका खेलाडीलाई प्रतिस्पर्धात्मक मञ्च उपलब्ध गराउने उद्देश्यसहित रुपन्देहीमा शुक्रबारदेखि सातौँ खड्गप्रसाद गौचन स्मृति यु-१९ राष्ट्रिय क्रिकेट प्रतियोगिता सुरु हुने भएको छ ।
बिहीबार आयोजित पत्रकार सम्मेलनमा प्रतियोगिताको तयारी पूरा भएको जानकारी दिँदै आयोजक स्टार क्रिकेट एकेडेमीका संरक्षक शक्ति गौचनले ५० ओभरको प्रतियोगिताले युवा खेलाडीलाई ब्याटिङ र बलिङ दुवै पक्षमा परिपक्व बनाउन सहयोग पुग्ने बताए । “केवल २० ओभरका खेलले पर्याप्त अनुभव दिँदैन, उमेर समूहका खेलाडीका लागि ५० ओभरको अभ्यास जरुरी छ,” उनले भने । रुपन्देहीबाट उमेर समूहमा खेलेका धेरै खेलाडीले पछिल्लो समय राष्ट्रिय टोलीमा दाबेदारी प्रस्तुत गरिरहेको पनि उनले उल्लेख गरे ।
एक्स्ट्राटेक ओभल क्रिकेट मैदानमा सञ्चालन हुने प्रतियोगितामा काठमाडौं, रुपन्देही र पोखराबाट गरी ६ टोली सहभागी हुनेछन् । उद्घाटन खेलमा शुक्रबार नेपथ्य तिलोत्तमा क्रिकेट एकेडेमी र न्यु होराइजन स्पोर्ट्स क्लबबीच प्रतिस्पर्धा हुनेछ ।
प्रतियोगितामा नेपथ्य तिलोत्तमा क्रिकेट एकेडेमी, न्यु होराइजन स्पोर्ट्स क्लब क्रिकेट, एक्सलेन्स सेन्टर काठमाडौं, पोखरा क्रिकेट एकेडेमी, रुपन्देही क्रिकेट र वेस्टर्न क्रिकेट एकेडेमीले उपाधिका लागि प्रतिस्पर्धा गर्नेछन् ।
प्रतियोगिताको फाइनल खेल फागुन ९ गते आयोजना गरिने कार्यक्रम छ ।
प्रतिक्रिया