काठमाडौं । आईसीसी टी-२० विश्वकपअन्तर्गत आयोजक भारतले लगातार दोस्रो जित दर्ता गरेको छ । दिल्लीस्थित अरुण जेटली स्टेडियममा बिहीबार राति सम्पन्न खेलमा भारतले नामिबियामाथि ९३ रनको फराकिलो विजय हासिल गरेको हो ।
पहिले ब्याटिङ गरेको भारतले निर्धारित २० ओभरमा ९ विकेट गुमाउँदै २०९ रन बनायो । २१० रनको विशाल लक्ष्य पछ्याएको नामिबिया १८.२ ओभरमा ११६ रनमै अलआउट भयो ।
भारतका लागि ओपनर ईशान किशनले आक्रामक ब्याटिङ गर्दै २४ बलमा ६१ रन बनाए । हार्दिक पाण्ड्याले ५२ रनको महत्त्वपूर्ण योगदान दिए भने तिलक वर्माले २५ रन जोडे । शिवम दुबे २३ रनमा रनआउट भए । कप्तान सूर्यकुमार यादव १२ रनमै आउट हुँदा सन्जु सैमसनले २२ रन बनाए । अक्षर पटेल खाता नखोली पभेलियन फर्किए ।
नामिबियाका कप्तान जेरार्ड इरास्मसले उत्कृष्ट बलिङ गर्दै ४ विकेट लिए। उनले १९औं ओभरमा लगातार तीन विकेट लिँदै भारतको रन गति केही समयका लागि रोकेका थिए ।
जवाफमा नामिबियाका लागि लोरेन स्टीनक्याम्पले सर्वाधिक २९ रन बनाए भने जान फ्राइलिंकले २२ रन जोडे । अन्य ब्याट्सम्यानले उल्लेख्य योगदान दिन सकेनन् ।
भारतका लागि वरुण चक्रवर्तीले ३ विकेट लिए । हार्दिक पाण्ड्याले ब्याट र बल दुवैमा प्रभाव देखाउँदै २ विकेट लिए भने अक्षर पटेलले पनि २ विकेट हात पारे ।
यस जितसँगै समूह ‘ए’मा भारतले २ खेलबाट ४ अंक बनाएको छ । पहिलो खेलमा भारतले अमेरिकालाई २९ रनले हराएको थियो । समान अंक भएको पाकिस्तान दोस्रो स्थानमा रहे पनि भारत रनरेटका आधारमा शीर्ष स्थानमा छ ।
दुई खेल खेलिसकेको नामिबिया भने अंकविहीन छ । पहिलो खेलमा नामिबिया नेदरल्यान्ड्ससँग ७ विकेटले पराजित भएको थियो ।
प्रतिक्रिया