बुटवल । समयको प्रवाहसँगै धेरै मानिसहरू जन्मन्छन् र हराउँछन्, तर केही व्यक्तित्व यस्ता हुन्छन् जसले आफ्नो कर्म, दृष्टि र समर्पणमार्फत समाजमा स्थायी छाप छोड्न सफल हुन्छन् । त्यस्तै व्यक्तित्वमध्ये एक हुन् चुन्नप्रसाद शर्मा पौडेल, जसले शिक्षा, उद्योग, समाजसेवा र राजनीतिका क्षेत्रमा समानान्तर पहिचान बनाएका छन् ।
बागलुङ मा जन्मिएर हुर्किएका पौडेलले जीवनको प्रारम्भिक संघर्ष पार गर्दै रुपन्देही लाई कर्मभूमि बनाए । वि.सं. २०२२ साल असार २७ गते हुग्दिशिरमा जन्मिएका उनी बाबु पशुपति शर्मा र आमा पार्वती पौडेल शर्माबाट नैतिकता, अनुशासन र परिश्रमको संस्कार ग्रहण गर्दै हुर्किए । प्रारम्भिक शिक्षा गुल्मीको शान्तिपुरबाट सुरु गरी उच्च शिक्षाका लागि उनी भारतको बनारस पुगे । त्यहाँको आध्यात्मिक र बौद्धिक वातावरणले उनको सोचलाई फराकिलो बनायो र समाजप्रतिको जिम्मेवारीबोध अझ सशक्त बनायो ।
शिक्षा पूरा गरी स्वदेश फर्किएपछि उनले वि.सं. २०३८ सालमा शिक्षण पेशाबाट आफ्नो सार्वजनिक जीवन सुरु गरे । करिब चार वर्ष अध्यापन गरेपछि उनले आर्थिक सशक्तिकरणमार्फत समाज रूपान्तरण सम्भव हुने निष्कर्षसहित उद्योग क्षेत्रमा पाइला टेके । वि.सं. २०४९ सालमा रुपन्देहीको संगमपथमा सानो पसलबाट सुरु भएको उनको यात्रा आज बहुआयामिक औद्योगिक समूहमा विस्तार भएको छ ।
उनको नेतृत्वमा स्थापना भएको यशोदा फूड प्रोडक्स ले नेपाली उत्पादनलाई अन्तर्राष्ट्रिय बजारसम्म पुर्याएको छ । त्यस्तै बुटवल हस्पिटल प्रा.लि. मार्फत स्वास्थ्य सेवामा पहुँच विस्तार गरिएको छ भने ह्यात प्यालेस जस्ता पूर्वाधार परियोजनाले पर्यटन क्षेत्रको विकासमा योगदान पुर्याएका छन् । उनका उद्योगहरूमा प्रत्यक्ष रूपमा पाँच हजारभन्दा बढी नेपालीले रोजगारी पाएका छन्, जसले हजारौँ परिवारको जीवनस्तर सुधार्न मद्दत पुगेको छ ।
पौडेलको भूमिका उद्योगीमा मात्र सीमित छैन । महामारी, प्राकृतिक विपत्ति र सामाजिक संकटका बेला उनले राहत, स्वास्थ्य सेवा सहयोग तथा एम्बुलेन्स व्यवस्थापनजस्ता मानवीय कार्यमार्फत सामाजिक उत्तरदायित्व निर्वाह गरेका छन् । उनका लागि व्यवसाय केवल नाफाको माध्यम नभई समाजसेवाको आधार बनेको देखिन्छ ।
विकास र समृद्धिको स्पष्ट दृष्टिकोणसहित सार्वजनिक जीवनमा सक्रिय पौडेल स्थानीय उत्पादन प्रवर्द्धन, स्वदेशमै रोजगारी सिर्जना, युवा उद्यमशीलताको विकास तथा पारदर्शी शासन व्यवस्थाको पक्षमा आवाज उठाउँदै आएका छन् । उनी महिलाको आर्थिक सशक्तीकरण र युवालाई स्वदेशमै अवसर खोज्न प्रेरित गर्ने पक्षमा दृढ देखिन्छन् ।
वि.सं. २०४० सालमा उमादेवी शर्मासँग वैवाहिक जीवनमा बाँधिएका पौडेल हाल बुटवल उपमहानगरपालिका-११ मा बसोबास गर्दै आएका छन् । पारिवारिक एकता र मूल्यलाई आफ्नो सफलताको आधार मान्ने उनी साधारण परिवेशबाट उठेर असाधारण उपलब्धि हासिल गर्ने उदाहरणीय व्यक्तित्वका रूपमा चिनिन्छन् ।
राजनीतिक रूपमा पनि सक्रिय रहेका पौडेल नेपाली काँग्रेस का महासमिति सदस्य हुन् । आगामी प्रतिनिधिसभा निर्वाचनमा काँग्रेसले उनलाई रुपन्देही क्षेत्र नम्बर २ बाट उम्मेदवार बनाएको छ । उनी आफ्नो सामाजिक र व्यावसायिक जीवनमा सबैसँग समान व्यवहार गरेको उल्लेख गर्दै निर्वाचनमा व्यापक जनसमर्थन प्राप्त हुने विश्वास व्यक्त गर्छन् ।
उद्योग, समाजसेवा र राजनीतिमा समान रूपमा सक्रिय पौडेलको जीवनयात्रा व्यक्तिगत सफलताको कथा मात्र नभई स्वदेशमै सम्भावना सिर्जना गर्न सकिन्छ भन्ने सन्देश दिने प्रेरणादायी उदाहरणका रूपमा उभिएको छ ।
प्रतिक्रिया