झापा-५ मा आज ओलीको चुनावी प्रतिबद्धता-पत्र सार्वजनिक हुँदै

झापा । नेकपा एमालेका अध्यक्ष तथा झापा-५ बाट प्रतिनिधिसभा सदस्य पदका उम्मेदवार केपी शर्मा ओलीले आज आफ्नो चुनावी प्रतिबद्धता-पत्र सार्वजनिक गर्ने भएका छन्।

निर्वाचन प्रचार अभियानलाई तीव्रता दिँदै आएका अध्यक्ष ओलीले दिउँसो ३ बजे दमक-९ को अमरसिंह चोकमा आयोजित कार्यक्रममा प्रतिबद्धता-पत्र सार्वजनिक गर्ने कार्यक्रम तय गरिएको छ।

ओलीको निर्वाचन परिचालन कमिटीका संयोजक देवेन्द्र दाहालका अनुसार उक्त प्रतिबद्धता–पत्रमा ओली विजयी भएपश्चात झापा-५ क्षेत्रमा गरिने विकास योजना र कार्यक्रमहरूको विस्तृत विवरण समेटिएको छ। साथै नेपालमा कम्युनिस्ट आन्दोलनको स्थापना, एमाले नेतृत्वका सरकारहरूले गरेका उपलब्धि, तथा सुरु भई अपूरा रहेका योजनाहरूको अवस्थाबारे पनि दस्तावेजमा उल्लेख गरिएको उनले जानकारी दिए।

अमरसिंह चोकमा आयोजना हुने चुनावी सभामार्फत प्रतिबद्धता-पत्र सार्वजनिक गरिनेछ। आजै अध्यक्ष ओलीले दमक-३ को दुम्से र टुकुरेमा प्रचार कार्यक्रम गर्नेछन्। त्यसैगरी दमक-८ को संगम चोक र कृष्ण मन्दिर क्षेत्र हुँदै दमक-१० को सूर्य चोकमा समेत चुनावी प्रचारप्रसार कार्यक्रम तय गरिएको छ।