काठमाडौं । नेकपा (एमाले)का अध्यक्ष केपी शर्मा ओलीले राष्ट्रिय स्वतन्त्र पार्टी (रास्वपा) चुनावी प्रक्रिया प्रभावित पार्ने प्रयासमा लागेको आरोप लगाएका छन्।
आफ्नो निर्वाचन क्षेत्र झापा–५ जाने क्रममा आज भद्रपुर विमानस्थलमा सञ्चारकर्मीहरूसँग कुरा गर्दै अध्यक्ष ओलीले रास्वपाले आफू अनुकूल नतिजा नआउने देखेपछि चुनाव भाँड्न खोजेको दाबी गरे। उनका अनुसार चुनाव जित्ने सम्भावना कमजोर देखिएपछि रास्वपा विभिन्न हत्कण्डा अपनाउँदै उत्तेजनात्मक गतिविधितर्फ उन्मुख भएको छ।
ओलीले रास्वपा आफ्नो पक्षमा परिणाम आउने देखे चुनाव लड्ने तर प्रतिकूल देखिए चुनाव हुनै नदिन खोज्ने प्रवृत्तिमा देखिएको आरोप लगाए। पछिल्ला केही दिनका घटनाक्रमहरूले पनि उक्त पार्टी चुनाव बिथोल्ने दिशामा केन्द्रित भएको संकेत गरेको उनको भनाइ थियो।
निर्वाचन प्रक्रिया स्वच्छ, निष्पक्ष र शान्तिपूर्ण हुनुपर्नेमा जोड दिँदै ओलीले भने, “निर्वाचन बलजफती गर्ने विषय होइन। नियम–कानुनभित्र रहेर स्वच्छ र स्वस्थ प्रतिस्पर्धा हुनुपर्छ। मतदाताले निर्भय वातावरणमा कुनै दुविधाविना आफ्नो मत हाल्न पाउनुपर्छ। मतदानपूर्वदेखि मतगणना र परिणाम घोषणासम्म सम्पूर्ण प्रक्रिया पारदर्शी र धाँधलीरहित हुन आवश्यक छ।”
उनले विभिन्न पक्षबाट चुनावअगाडि नै द्वन्द्वका कारण समाधान गर्नुपर्ने आवाज उठिरहेको उल्लेख गर्दै उनले त्यसलाई ख्याल गरिनुपर्ने धारणा राखे ।
प्रतिक्रिया