काठमाडौं । राष्ट्रिय स्वतन्त्र पार्टी (रास्वपा) मधेश प्रदेशकी संस्थापक सभापति ममता शर्माले पार्टी परित्याग गरेकी छन् । हाल पार्टीको केन्द्रीय महिला तथा सामाजिक विकास विभागकी सदस्यसमेत रहेकी शर्माले साधारण सदस्यसमेत नरहने गरी राजीनामा दिएको जानकारी दिएकी छन् ।
बुधबार विज्ञप्ति जारी गर्दै उनले पार्टीभित्र इमानदार र निष्ठावान व्यक्तिहरुको उचित मूल्यांकन नभएको तथा आर्थिक अनियमितता भएको आरोप लगाउँदै पार्टीमा रहिरहन नसक्ने निष्कर्षमा पुगेको उल्लेख गरेकी छन् ।
विज्ञप्तिमा उनले भनिन्, “आर्थिक अनियमितताबाट पार्टीका निर्णयहरू प्रभावित भएको अवस्थाले मेरो आत्मसम्मान र राजनीतिक मूल्यहरूमाथि आँच पुर्याएको छ । यस्ता गतिविधिको साक्षी भएर मौन बसिरहन अब सम्भव छैन ।”
शर्माले सोही कारण आजकै मितिदेखि लागू हुने गरी पार्टीको सम्पूर्ण जिम्मेवारी तथा साधारण सदस्यसमेत नरहने गरी राजीनामा दिएको स्पष्ट पारेकी छन् ।
प्रतिक्रिया