काठमाडौं । आइसीसी टी-२० विश्वकपअन्तर्गत समूह ‘ए’ को अन्तिम खेलमा भारत राष्ट्रिय क्रिकेट टोलीले नेदरल्याण्ड्स राष्ट्रिय क्रिकेट टोलीलाई १७ रनले पराजित गरेको छ । बुधबार राति सम्पन्न खेलमा भारतले दिएको १९४ रनको लक्ष्य पछ्याएको नेदरल्याण्ड्सले निर्धारित २० ओभरमा १७६ रन मात्र बनाउन सक्यो ।
नेदरल्याण्ड्सका लागि बास डे लीडेले सर्वाधिक ३३ रन बनाए । उनले २३ बलमा ३ चौका र एक छक्का प्रहार गरेका थिए । त्यस्तै माइकल लेविटले २४ रन जोड्दा कोलिन एकरम्यानले २३ तथा म्याक्स ओ’डाउडले २० रनको योगदान दिएका थिए । अन्य ब्याट्सम्यानले उल्लेखनीय प्रदर्शन गर्न नसक्दा टोली लक्ष्य नजिक पुगेर पनि जित निकाल्न असफल भयो ।
भारतका लागि वरुण चक्रवर्तीले उत्कृष्ट बलिङ गर्दै तीन विकेट लिए । उनले तीन ओभरमा मात्र १४ रन खर्चिए । शिवम् दुबेले दुई विकेट लिए भने जसप्रित बुमराह र हार्दिक पाण्ड्याले समान एक–एक विकेट हात पारे ।
यसअघि नरेन्द्र मोदी क्रिकेट स्टेडियममा टस जितेर पहिले ब्याटिङ गरेको भारतले निर्धारित २० ओभरमा पाँच विकेट गुमाउँदै १९३ रन बनाएको थियो । भारतका लागि शिवम् दुबेले सर्वाधिक ६६ रनको आक्रामक इनिङ खेले । उनले ३१ बलमा ६ छक्का र ४ चौका प्रहार गरेका थिए ।
त्यस्तै कप्तान सूर्यकुमार यादवले ३४ रन बनाउँदा तिलक बर्माले ३१ तथा हार्दिक पाण्ड्याले ३० रनको योगदान दिए । इशान किशन भने १८ रनमा आउट भए ।
नेदरल्याण्ड्सका लागि लोगान भान बीकले तीन विकेट लिए । उनले चार ओभरमा ५६ रन खर्चिए। आर्यन दत्तले दुई विकेट लिए भने काइल क्लेनले एक विकेट हात पारे ।
यस जितसँगै भारतले समूह चरणको अन्तिम खेलमा विजयी नतिजा निकाल्दै प्रतियोगितामा आफ्नो बलियो उपस्थिति कायम राखेको छ ।
प्रतिक्रिया