बुटवल । बुटवलको देवीनगरस्थित गार्गी एकेडेमीले आफ्नो १६ औँ स्थापना दिवसको अवसरमा ‘किड्स फेस्टिभल २०८२’ सम्पन्न गरेको छ । बालबालिकाको प्रतिभा प्रस्फुटन, सिर्जनशीलता विकास तथा अतिरिक्त क्रियाकलापमार्फत समग्र व्यक्तित्व विकास गर्ने उद्देश्यले उक्त कार्यक्रम आयोजना गरिएको विद्यालयले जनाएको छ ।
विद्यालय व्यवस्थापन समितिका अध्यक्ष झविन्द्र अधिकारीको अध्यक्षतामा सम्पन्न कार्यक्रममा प्याब्सन नेपालका केन्द्रीय उपाध्यक्ष टीकाराम न्यौपाने प्रमुख अतिथिका रूपमा सहभागी भएका थिए । त्यस्तै, प्याब्सन बुटवलका अध्यक्ष मित्रहरी आचार्य विशिष्ट अतिथिका रूपमा उपस्थित थिए ।
कार्यक्रममा विद्यालयका प्राचार्य भुवन अधिकारीले स्वागत मन्तव्य व्यक्त गर्दै विद्यालयले शैक्षिक गुणस्तरका साथै विद्यार्थीको सर्वाङ्गीण विकासमा विशेष ध्यान दिँदै आएको बताए । उनले यस्ता कार्यक्रमले विद्यार्थीको आत्मविश्वास वृद्धि गर्नुका साथै उनीहरूको प्रतिभा उजागर गर्न महत्वपूर्ण भूमिका खेल्ने उल्लेख गरे ।
कार्यक्रमको सञ्चालन विद्यार्थीहरू अन्सु क्षेत्री र आयुष अधिकारीले संयुक्त रूपमा गरेका थिए भने कार्यक्रम संयोजन शिक्षिका बिनिता पुन मगरले गरेकी थिइन् । कार्यक्रममा शिवशक्ति टोल विकास संस्थाका अध्यक्ष रेशम बहादुर महरालगायत अभिभावक, शिक्षक तथा विद्यार्थीहरूको उल्लेखनीय सहभागिता रहेको थियो ।
कार्यक्रमअन्तर्गत विद्यार्थीहरूले नृत्य, गीत, कविता वाचन, नाटक तथा विभिन्न सिर्जनात्मक प्रस्तुति प्रस्तुत गरेका थिए । प्रस्तुतिहरूले सहभागी अभिभावक तथा अतिथिहरूको मन जित्न सफल भएका थिए । विद्यालयले यस्ता कार्यक्रममार्फत विद्यार्थीहरूमा नेतृत्व क्षमता, रचनात्मकता र सामाजिक सहभागिताको भावना विकास गर्ने उद्देश्य राखेको जनाएको छ ।
विद्यालयका अनुसार हाल गार्गी एकेडेमीमा कक्षा नर्सरीदेखि माध्यमिक तहसम्म गरी कुल २ हजार ७६० विद्यार्थी अध्ययनरत छन् । विद्यालयले शैक्षिक उत्कृष्टतासँगै अतिरिक्त क्रियाकलापलाई पनि प्राथमिकता दिँदै आएको जनाएको छ ।
एकेडेमीले स्थापना दिवसको अवसरमा आयोजना गरिएका कार्यक्रमअन्तर्गतको मूल समारोह भने फागुन ९ गते आयोजना गरिने जानकारी दिएको छ । उक्त समारोहमा विभिन्न सांस्कृतिक, शैक्षिक तथा सम्मान कार्यक्रमहरू आयोजना गरिने विद्यालय प्रशासनले जनाएको छ ।
प्रतिक्रिया