काठमाडौं । आईसीसी टी-२० विश्वकप २०२६ अन्तर्गत समूह ‘डी’को खेलमा अफगानिस्तानले क्यानडामाथि सानदार जित हात पारेको छ । भारतको चेन्नईस्थित एम. ए. चिदम्बरम रंगशालामा सम्पन्न खेलमा अफगानिस्तानले क्यानडालाई ८३ रनको फराकिलो अन्तरले पराजित गरेको हो ।
२०१ रनको विशाल लक्ष्य पछ्याएको क्यानडाले निर्धारित २० ओभरमा ९ विकेट गुमाउँदै ११८ रन मात्र बनाउन सक्यो । क्यानडाका लागि हर्ष ठाकर र साद बिन जफरले समान ३०-३० रन बनाए पनि टोलीलाई हारबाट जोगाउन सकेनन् । यस्तै युवराज समराले १७ तथा दिलप्रीत बाजवाले १३ रनको योगदान दिएका थिए ।
अफगानिस्तानको जितमा अनुभवी अलराउन्डर मोहम्मद नाबीले उत्कृष्ट बलिङ प्रदर्शन गर्दै चार विकेट लिए । उनले चार ओभरमा मात्र ७ रन खर्चेर क्यानडाको ब्याटिङ लाइन ध्वस्त पारे । त्यस्तै राशिद खानले दुई विकेट लिए भने मुजीब उर रहमान र अजमातुल्लाह उमरजाईले समान एक-एक विकेट लिए ।
यसअघि टस हारेर पहिले ब्याटिङ गरेको अफगानिस्तानले निर्धारित २० ओभरमा चार विकेट गुमाउँदै २०० रनको बलियो योगफल तयार पारेको थियो । अफगानिस्तानका ओपनर इब्राहिम जदरानले विस्फोटक प्रदर्शन गर्दै ५६ बलमा अविजित ९५ रन बनाए । उनले आफ्नो इनिङ्समा ७ चौका र ५ छक्का प्रहार गर्दै टोलीलाई मजबुत स्थितिमा पुर्याए । साथै सेदिकुल्लाह अतलले ४४ तथा रहमानुल्लाह गुरबाजले ३० रनको योगदान दिएका थिए ।
क्यानडाका बलर जसकरण सिंहले तीन विकेट लिए पनि उनले चार ओभरमा ५२ रन खर्चिएका थिए । त्यस्तै डिलन हेलिगरले एक विकेट हात पारे ।
यस जितसँगै अफगानिस्तानले समूह ‘डी’मा आफ्नो स्थिति मजबुत बनाएको छ भने क्यानडा प्रतियोगितामा दबाबमा परेको छ । अफगानिस्तानको बलियो ब्याटिङ र अनुशासित बलिङका कारण टोलीलाई उपाधि दाबेदारका रूपमा हेरिन थालिएको छ ।
प्रतिक्रिया