रौतहट । जिल्ला प्रशासन कार्यालय रौतहटले सदरमुकाम गौरका विभिन्न क्षेत्रमा अनिश्चितकालीन कर्फ्यु आदेश जारी गरेको छ।
जिल्ला सुरक्षा समिति रौतहटको निर्णयअनुसार शनिबार दिउँसो १ बजेदेखि अर्को आदेश नभएसम्म कर्फ्यु लागू गरिएको हो।
प्रमुख जिल्ला अधिकारी दिनेश सागर भुसालद्वारा जारी सूचनाअनुसार स्थानीय प्रशासन ऐन, २०२८ को दफा ६ (क) बमोजिम कर्फ्यु आदेश जारी गरिएको हो। आदेश उल्लङ्घन गर्ने जो–कोहीलाई कानुनअनुसार कारबाही गरिने प्रशासनले चेतावनी दिएको छ।
कर्फ्यु आदेशअनुसार तोकिएको क्षेत्रभित्र कुनै पनि व्यक्ति आवत–जावत गर्न, भेला हुन, सभा, जुलुस तथा प्रदर्शन गर्न निषेध गरिएको छ। कर्फ्यु लागू गरिएका क्षेत्रहरूमा पूर्वतर्फ मुडवलवा गेट, पश्चिमतर्फ ललवैया बाँध, उत्तरतर्फ बम नहर र दक्षिणतर्फ गौर भन्सार कार्यालय गेटसम्मको परिधि समेटिएको छ।
गौर नगरपालिका–६ सवगढामा दुई समुदायबीच पुनः झडप भएपछि स्थिति तनावग्रस्त बनेको हो। जिल्ला प्रशासन कार्यालयको पहलमा शुक्रबार साँझ दुवै पक्षबीच ६ बुँदे सहमति भएको थियो। तर, शनिबार बिहान करिब ९ बजेदेखि पुनः ढुङ्गामुढा सुरु भई अवस्था नियन्त्रणबाहिर जान थालेपछि कर्फ्यु जारी गरिएको जनाइएको छ।
स्थिति नियन्त्रणमा लिन नेपाल प्रहरी र सशस्त्र प्रहरी बल नेपालका सयौँ सुरक्षाकर्मी परिचालन गरिएको छ। घटनास्थलमा जिल्ला प्रहरी प्रमुख एसपी सिताराम रिजाल तथा सशस्त्र प्रहरीका एसपी रामहरि अधिकारी स्वयं उपस्थित भई सुरक्षा व्यवस्थाको नेतृत्व गरिरहेका छन्।
प्रशासनले सर्वसाधारणलाई संयमता अपनाउन र अफवाहमा नलाग्न आग्रह गर्दै शान्ति सुरक्षा कायम गर्न सबै पक्षसँग सहयोगको अपिल गरेको छ।
प्रतिक्रिया