काठमाडौं । सिन्धुलीको मरिण गाउँपालिकामा निर्माणाधीन राँगाको मासु प्रशोधन उद्योगमा नेपाली र चिनियाँ कामदारबीच झडप हुँदा सात जना घाइते भएका छन्।
जिल्ला प्रहरी कार्यालय सिन्धुलीका अनुसार घाइतेमध्ये दुई जना नेपाली र पाँच जना चिनियाँ नागरिक रहेका छन्।
मरिणस्थित निर्माणाधीन हिमालयन फुड प्रोसेसिङ कम्पनीमा कार्यरत गाडी चालक स्थानीय नमराज बम्जनलाई कामबाट हटाइएको विषयलाई लिएर विवाद सुरु भएको बताइएको छ। नेपाली कामदारमाथि विभेद गरिएको आरोपपछि सुरु भएको भनाभन कुटाकुटमा परिणत भएको प्रहरीले जनाएको छ।
जिल्ला प्रहरी कार्यालयका सूचना अधिकारी प्रहरी नायब उपरीक्षक सूर्य प्रकाश सुवेदीका अनुसार घाइतेहरूलाई कपिलाकोटस्थित प्राथमिक उपचार केन्द्रमा सामान्य उपचार गरिएको छ।
घटनापछि स्थिति नियन्त्रणमा लिन प्रहरी परिचालन गरिएको छ भने घटनाबारे थप अनुसन्धान भइरहेको प्रहरीले जनाएको छ।
प्रतिक्रिया