सर्लाहीमा गगन थापालाई समर्थन गरेको जेनजी २.० ले रुपन्देहीमा विष्णु पौडेललाई समर्थन गर्ने

बुटवल । यही फागुन २१ गते हुने प्रतिनिधिसभा विर्नाचनमा जेनजी समूहले रुपन्देही क्षेत्र नम्बर २ का उम्मेदवार एमाले उपाध्यक्ष विष्णुप्रसाद पौडेललाई समर्थन गर्ने भएको छ । जेनजी २.० का प्रवक्ता अविन लिम्बुले कुनै राजनीतिक दलभन्दा पनि उम्मेदवाहरुको पृष्ठभूमि र उनीहरुको जनाधारका आधारमा समर्थन र सहयोग गर्ने जानकारी दिए ।

रुपन्देही एमाले उम्मेदवार पौडेलले भौतिक बिकास तथा पूर्वाधारको क्षत्रमा गरेका कामको मूल्याङ्कन तथा उनीप्रति आर्षित जनाधारका कारण जेनजी २.० ले समर्थन जनाएको उनले बताए । सोमबार बुटवलमा आयोजित पत्रकार सम्मेलनमा बोल्दै लिम्बुले सर्लाहीमा नेपाली काँग्रेसका उम्मेदवार गगन थापालाई समर्थ गरेजस्तै रुपन्देहीमा पौडेललाई समर्थन गरिएको उल्लेख गरे । यसैगरी चितवनमा पूर्व मेयर रेणु दाहाललाई जेनजी २.० ले समर्थन गर्ने उनले जानकारी दिए ।

जेनजी समुहले रुपन्देहीमा समेत मत सर्वेक्षण तथा उम्मेदवारहरुको पृष्ठभूमि र उनीहरुले गरेका कामका बारेमा मूल्याङ्कन गरिएको बताउँदै उनले राम्रो काम गर्ने जुनसुकै दलका उम्मेदवारलाई जेनजीहरु सहयोग गर्न तयार रहेको स्पष्ट पारे । पछिल्लो समय राष्ट्रिय स्वतन्त्र पार्टी (रास्वपा)को पक्षमा सामाजिक सञ्जालहरुमा जति चर्चा भएपनि मतपत्रमा उक्त अवस्था नरहने उनको विश्लेषण छ ।

जनताको पक्षमा असर काम गर्ने जुनसुकै दलका उम्मेदवारलाई प्रतिनिधिसभा निर्वाचनमा विजयी गराउनु पर्ने बताउँदै उनले राजनीतिक विचारभन्दा पनि पात्र र पात्रको प्रवृत्तिका आधारमा जेनजीहरुले साथ दिने उल्लेख गरे ।