बुटवल । जिल्ला प्रहरी कार्यालय रुपन्देही मातहतबाट खटिएको प्रहरी टोलीले जिल्लाका विभिन्न स्थानमा चेकजाँचका क्रममा भन्सार छली गरी अवैध रूपमा ल्याइएका करिब ८ लाख २३ हजार ७५० रुपैयाँ बराबरका सामान बरामद गरेको छ ।
प्रहरीले शुक्रबार जिल्लाका विभिन्न नाकाहरू र शंकास्पद स्थानमा चेकजाँच गर्ने क्रममा अवैध रूपमा चोरी पैठारी गरिएका कुखुरा, केरा तथा मोबाइलका डिस्प्ले नियन्त्रणमा लिई आवश्यक कारबाहीका लागि सम्बन्धित निकायमा पठाएको जनाएको छ । बरामद गरिएका सामग्री पशु क्वारेन्टाइन कार्यालय भैरहवा र भैरहवा भन्सार कार्यालय बेलहियामा बुझाइएको छ ।
प्रहरीका अनुसार लुम्बिनी प्रदेश प्रहरी कार्यालय र अस्थायी प्रहरी चौकी रमवापुरबाट खटिएको संयुक्त टोलीले मायादेवी गाउँपालिका-३ गुरबनियाबाट यूपी ५६ ई ३९०५ नम्बरको मोटरसाइकलमा अवैध रूपमा ल्याइँदै गरेको ७५ किलो बोइलर कुखुरा बरामद गरेको छ । मोटरसाइकलसहित उक्त कुखुराको अनुमानित मूल्य ६८ हजार ७५० रुपैयाँ रहेको प्रहरीले जनाएको छ ।
त्यसैगरी, जिल्ला प्रहरी कार्यालय रुपन्देहीबाट खटिएको टोलीले रोहिणी गाउँपालिका-२ खुरहुरियाबाट लु १० प ११३९ र लु ९ प ७३७१ नम्बरका मोटरसाइकलमा ल्याइँदै गरेको ८०० किलो काँचो केरा बरामद गरेको छ । बरामद गरिएको केराको अनुमानित मूल्य १ लाख ५० हजार रुपैयाँ रहेको छ ।
यस्तै, इलाका प्रहरी कार्यालय लुम्बिनीबाट खटिएको टोलीले लुम्बिनी सांस्कृतिक नगरपालिका-१२ भैसाहीबाट लु १४ प ६७२९ र यूपी ५५ जे २९६० नम्बरका मोटरसाइकलमा अवैध रूपमा ल्याइँदै गरेको २६० किलो जिउँदो बोइलर कुखुरा बरामद गरेको छ । मोटरसाइकलसहित उक्त कुखुराको अनुमानित मूल्य १ लाख ६५ हजार रुपैयाँ रहेको प्रहरीले जनाएको छ ।
त्यस्तै, इलाका प्रहरी कार्यालय मझगवाबाट खटिएको टोलीले कोटहीमाई गाउँपालिका-६ बोगढीघाटबाट अवैध रूपमा ल्याइएका मोबाइलका ११० थान डिस्प्ले बरामद गरेको छ । उक्त डिस्प्लेको अनुमानित मूल्य ४ लाख ४० हजार रुपैयाँ रहेको छ ।
प्रहरीले बरामद गरिएका सबै सामग्री आवश्यक अनुसन्धान तथा कानुनी कारबाहीका लागि सम्बन्धित निकायमा पठाइएको जनाएको छ । साथै, भन्सार छली तथा अवैध ओसारपसार नियन्त्रणका लागि निगरानी र चेकजाँचलाई थप कडाइ गरिएको प्रहरीले जनाएको छ ।
प्रतिक्रिया