भैरहवा । रुपन्देही प्रहरीले भैरहवास्थित एक रेष्टुरेन्टबाट १४ वटा जीवित कछुवा बरामद गर्दै रेष्टुरेन्ट सञ्चालकलाई पक्राउ गरेको छ ।
जिल्ला प्रहरी कार्यालय रुपन्देही र वडा प्रहरी कार्यालय भैरहवाबाट खटिएको संयुक्त टोलीले जीवित कछुवाको अवैध बिक्री-वितरण भइरहेको गोप्य सूचनाका आधारमा सिद्धार्थनगर नगरपालिका-८ स्थित एक रेष्टुरेन्टमा छापा मार्दा १४ वटा जीवित कछुवा बरामद गरेको हो ।
जिल्ला प्रहरी कार्यालय रुपन्देहीका सूचना अधिकारी (प्रहरी नायब उपरीक्षक) कृष्णकुमार चन्दका अनुसार घटनामा संलग्न रहेको आरोपमा सोही रेष्टुरेन्टका सञ्चालक ३८ वर्षीय कञ्चन श्रेष्ठलाई नियन्त्रणमा लिइएको छ ।
बरामद कछुवा र पक्राउ परेका श्रेष्ठलाई थप अनुसन्धान तथा आवश्यक कानुनी कारबाहीका लागि डिभिजन वन कार्यालय, भैरहवामा बुझाइएको प्रहरीले जनाएको छ ।
नेपालको प्रचलित वन्यजन्तुसम्बन्धी कानुनअनुसार संरक्षित वन्यजन्तुको अवैध कारोबार, ओसारपसार वा बिक्री-वितरण दण्डनीय अपराध मानिन्छ । प्रहरीले यस्ता गतिविधिविरुद्ध निगरानी र कारबाहीलाई निरन्तरता दिएको जनाएको छ ।
प्रतिक्रिया