पराजयको नैतिक जिम्मेवारी लिँदै कांग्रेस सभापति गगन थापा राजीनामा दिने सोचमा

काठमाडौं । प्रतिनिधिसभा निर्वाचनमा पार्टीले अपेक्षित परिणाम हासिल गर्न नसकेपछि कांग्रेस सभापति गगन थापाले राजीनामा दिने सोच बनाएका छन् ।

थापाले आज साँझ उपसभापति विश्वप्रकाश शर्मासँग भेट गरी पदबाट राजीनामा दिने सोच बनाएको बताएका हुन् । स्रोतका अनुसार प्रतिनिधिसभा निर्वाचनमा पार्टीले पनि अपेक्षित सफलता हासिल गर्न नसकेमा नैतिक जिम्मेवारी लिँदै राजीनामा दिने मनस्थितिबारे उपसभापति शर्मासँग थापाले कुराकानी गरेका हुन्। तर उपसभापति शर्माले भने अहिलेको अवस्थामा राजीनामा दिन नहुने सुझाव दिएका छन्। शर्माले निर्वाचन परिणामलाई केवल कुनै एक व्यक्तिको कमजोरीका रूपमा हेर्न नहुने धारणा राखेका छन्। उनले यो परिणाम समग्र राजनीतिक परिस्थितिको उपज भएको भन्दै थापालाई सम्झाएका छन् ।

शर्माले नयाँ कार्यसमिति गठन भएको पाँच दिनमै उम्मेदवारी दर्ता भएको र करिब ५० दिनमै निर्वाचन सम्पन्न भएको अवस्थालाई पनि ध्यान दिनुपर्ने बताएका छन्। यस्तो अवस्थामा तत्काल राजीनामा भन्दा पनि परिणामको सूक्ष्म समीक्षा गर्दै पार्टीलाई सम्हालेर अघि बढ्नु उपयुक्त हुने उनको सुझाव रहेको बताइएको छ।