काठमाडौं । नेपाली कांग्रेसका सभापति गगनकुमार थापाले पदबाट राजीनामा दिएका छन् । गत प्रतिनिधिसभा सदस्य निर्वाचनमा पार्टीको कमजोर प्रदर्शनपछि नैतिक जिम्मेवारी लिँदै उनले उपसभापति विश्वप्रकाश शर्मा समक्ष राजीनामा बुझाएको स्रोतले जनाएको छ ।
थापाको राजीनामाबारे छलफल गर्न शुक्रबार दिउँसो १ बजे केन्द्रीय कार्यसमिति बैठक बोलाइएको छ । बैठकले राजीनामा स्वीकृत गर्ने सम्भावना भने न्यून रहेको एक केन्द्रीय सदस्यले बताएका छन् ।
निर्वाचनको प्रारम्भिक परिणाम सार्वजनिक भएसँगै राजीनामाको तयारीमा रहेका थापालाई पार्टीका शीर्ष नेताहरूले पद नछोड्न सुझाव दिँदै आएका थिए । यद्यपि पार्टीभित्रैको एक समूहले भने उनलाई सार्वजनिक रूपमा राजीनामा दिन दबाब दिँदै आएको थियो ।
प्रतिनिधिसभा निर्वाचनमा पार्टीको अपेक्षाभन्दा कमजोर प्रदर्शनसँगै थापा स्वयं पनि सर्लाही क्षेत्र नम्बर ४ बाट पराजित भएका थिए ।
यसअघि गत पुसमा काठमाडौंमा सम्पन्न कांग्रेसको विशेष महाधिवेशनबाट थापाको नेतृत्वमा नयाँ कार्यसमिति चयन भएको थियो ।
प्रतिक्रिया