काठमाडौं । इरानको सुरक्षा निकायले होर्मुज जलडमरु क्षेत्रमा पक्राउ गरेको नेपाली नागरिकको पहिचान खुलेको छ। परराष्ट्र मन्त्रालयका अनुसार पक्राउ पर्ने व्यक्ति पानीजहाजमा कार्यरत अमृत झा रहेको जनाइएको छ।
इरानी सुरक्षा निकायले होर्मुज जलमार्गबाट अमृत झा नाम गरेका एक नेपालीलाई नियन्त्रणमा लिएको जानकारी प्राप्त भएको परराष्ट्र मन्त्रालयअन्तर्गत मध्य एसिया, पश्चिम एसिया तथा अफ्रिका महाशाखाका प्रमुख रामकाजी खड्काले बताएका छन् ।
यसैबीच, इरानमा रहेका थप चार जना नेपाली सम्पर्कमा आएको मन्त्रालयले जनाएको छ। यसअघि त्यहाँ ६ जना नेपाली रहेको जानकारी रहेकामा अहिले थप चार जना सम्पर्कमा आएपछि कुल १० जना नेपाली रहेको पुष्टि भएको हो। उनीहरू सबै सुरक्षित रहेको मन्त्रालयले जनाएको छ।
महाशाखा प्रमुख खड्काका अनुसार ती १० जनाले भारतीय नागरिकको उद्धारका लागि पठाउने जहाजमार्फत स्वदेश फर्किन नाम दर्ता गराएका छन्।
प्रतिक्रिया