पाल्पा । पाल्पामा शनिबार साँझ भएको टिपर दुर्घटनामा तीनजनाको मृत्यु भएको छ। दुर्घटनाबाट एकजना गम्भीर घाइते भएका छन्।
मृत्यु हुनेमा अर्घाखाँचीको शीतगङ्गा नगरपालिका-४ सिद्धारका २६ वर्षीय चिन्ताबहादुर सुनारको मात्र सनाखत भएको र अन्य दुईजनाको सनाखत नभएको प्रहरीले जनाएको छ ।
दुर्घटनाबाट तानसेन नगरपालिका-१० पटुवाका ३३ वर्षीय राजन चिदी गम्भीर घाइते भएको जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक होमप्रकाश चौधरीले बताए।
प्रहरी नायब उपरीक्षक चौधरीका अनुसार माथागढी गाउँपालिकाको झडेवाबाट रहबास चुन ढुंगा खानीतर्फ जाँदै गरेको लु२ख ४५२५ नम्बरको टिपर माथागढी गाउँपालिका-७ रहबास स्थित झडेवा रहबास भित्री कच्ची सडकखण्डमा आज बेलुकी ६ बजे दुर्घटना भएको हो।
दुर्घटनामा गम्भीर घाइते भएका उनीहरूलाई तानसेनस्थित लुम्बिनी मेडिकल कलेज प्रभासमा लैजाँदा चिकित्सकले तीनजनालाई मृत घोषणा गरेका डीएसपी चौधरीले बताए। गम्भीर घाइते चिडी मगरको सोही अस्पतालमा उपचार भइरहेको छ।
टिपर सडकभन्दा ५० मिटर तल खसेको छ। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया