काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले चैत १३ गते मध्याह्नका लागि प्रधानमन्त्रीको शपथ लिने साइत जुराइएको छ ।
रास्वपाका महामन्त्री कबिन्द्र बुर्लाकोटीले शुक्रबार मध्याह्न १२ बजेर ३४ मिनेटमा शपथ लिने समय तय भएको जानकारी दिए। बर्लाकोटीका अनुसार जुरेको साइतको समयमा शपथको तयारीका लागि राष्ट्रपतिको कार्यालयलाई आग्रह गरिएको छ।
शपथ ग्रहण समारोहमा १०८ वटा बटुकबाट स्वस्ति शान्ति वाचनसहित ७ वटा शंखबाट शंकनाद गरिने भएको बुर्लाकोटीले जानकारी दिए।
यससँगै शपथ ग्रहण समारोहमा बौद्ध भिक्षुहरुले अष्ठमंगल पाठ गर्ने पनि तय भएको छ । समारोहमा १६ जना बौद्ध भिक्षुबाट अष्ठमंगल पाठ गरिने तय गरिएको उनले बताए।
प्रधानमन्त्रीको शपथ लिएपछि दिउँसो पद बहालीको पनि साइत जुराइएको छ । शुक्रबार दिउँसो २ बजेर १५ मिनेटको समयमा पद बहालीको साइत जुरेको बताइएको छ । जुरेको शुभ साइतमा सिंहदरबारस्थित प्रधानमन्त्री तथा मन्त्रिपरिषद्को कार्यालयमा बालेन्द्रले पद बहाली गर्ने बुर्लाकोटीले बताए।
गत फागुन २१ गते सम्पन्न प्रतिनिधि सभाको निर्वाचनमा रास्वपाले १८२ सिट जितेको छ। झण्डै दुई तिहाई बहुमत प्राप्त गरेको रास्वपाले एकल सरकार बनाउँदै छ। बिहीबार संसद् भवन सिंहदरबारमा नवनिर्वाचित सांसदहरूले शपथग्रहण कार्यक्रम राखिएको छ ।
बिहिबार नै रास्वपाको केन्द्रीय समितिको बैठक बस्ने र बिधानमा रहेको बाधा अड्काउ फुकाएर संसदीयदलको बैठक बोलाइने पनि तय भएको छ । संसदीयदलको बैठकले शाहलाई नेता चयन गर्ने छ ।
प्रतिक्रिया