मोलुका । इन्डोनेसियाको मोलुका टापु आसपास बिहीबार बिहान ७.४ म्याग्निच्युडको शक्तिशाली भूकम्प गएको छ । अमेरिकी भूगर्भ सर्वेक्षण (यूएसजीएस) का अनुसार सुरुमा ७.८ म्याग्निच्युड मापन गरिएको उक्त भूकम्प स्थानीय समयअनुसार बिहान ६:४८ बजे गएको हो ।
भूकम्पको केन्द्रविन्दु टर्नेट सहर बाट करिब १२० किलोमिटर दूरीमा रहेको जनाइएको छ ।
भूकम्पपछि प्रशान्त सुनामी चेतावनी केन्द्रले केन्द्रविन्दुबाट करिब एक हजार किलोमिटर क्षेत्रभित्र पर्ने फिलिपिन्स र मलेसिया लगायतका तटीय क्षेत्रमा सुनामी आउन सक्ने सम्भावना रहेको भन्दै उच्च सतर्कता अपनाउन निर्देशन दिएको छ ।
भूकम्पको धक्का जापान सम्म महसुस गरिएको छ । जापानी मौसम विज्ञान एजेन्सीले केही समुद्री तटहरूमा पानीको सतहमा सामान्य परिवर्तन हुन सक्ने चेतावनी जारी गरेको छ ।
यस विपत्तिमा हालसम्म उत्तर सुलावेसी को मिनाहासा क्षेत्रमा एक ७० वर्षीया महिलाको घर भत्किँदा मृत्यु भएको पुष्टि भएको छ । साथै मनाडो सहर मा भवनहरूमा क्षति पुगेको र फर्निचरहरू सडकमा छरपस्ट भएको दृश्य सार्वजनिक भएका छन् । राष्ट्रिय खेलकुद समितिको भवनसमेत क्षतिग्रस्त भएको जनाइएको छ ।
मुख्य भूकम्पपछि ५.५ र ५.२ म्याग्निच्युडका दुईवटा पराकम्प आइसकेका छन् । इन्डोनेसियाको राष्ट्रिय भूगर्भ एजेन्सीले थप शक्तिशाली पराकम्प आउन सक्ने चेतावनी दिएको छ ।
अधिकारीहरूले तटीय क्षेत्र र पहिरो जान सक्ने जोखिमयुक्त स्थानबाट टाढा रहन सर्वसाधारणलाई आग्रह गरेका छन् ।
प्रतिक्रिया