काठमाडौं। सरकारले अबदेखि सरकारी कार्यालय तथा शैक्षिक संस्थामा शनिबार र आइतबार बिदा दिने निर्णय गरेको छ। मन्त्रिपरिषद्को आज बसेको बैठकले यस्तो निर्णय गरेको हो ।
पेट्रोलियम पदार्थको आपूर्तिमा देखिएको असहज अवस्थालाई ध्यानमा राख्दै सरकारी र शैक्षिक संस्थानमा शनिबार र आइतबार बिदा दिने निर्णय गरिएको सरकारका प्रवक्ता सस्मित पोखरेलले बताए । यो व्यवस्था भोलि चैत २३ गतेदेखि नै लागु हुनेछ ।
ऊर्जा आपूर्ति व्यवस्थापनलाई सहज बनाउन अस्थायी रूपमा दुई दिन सार्वजनिक बिदा दिने नीति अवलम्बन गरेको उनले बताए । यसरी बिदा दिँदा सरकारी कार्यालयमा कामकाजको समय बिहान ९ बजेदेखि साँझ ५ बजेसम्म तोकिएको छ । शैक्षिक संस्थाहरुमा भने पूर्ववत समयमा पठनपाठन हुने उनले बताए ।
त्यस्तै, मन्त्रिपरिषद् बैठकले आगामी शैक्षिक सत्र बैशाख १५ गतेदेखि सुरु गर्ने निर्णय पनि गरेको प्रवक्ता पोखरेलले बताए।
प्रतिक्रिया