काठमाडौं । केपी शर्मा ओली र रमेश लेखकविरुद्ध दायर बन्दीप्रत्यक्षीकरणको रिटमा आज पनि सर्वोच्च अदालतमा सुनुवाइ हुँदैछ ।
आइतबार विनोद शर्मा र सुनिलकुमार पोखरेलको संयुक्त इजलासमा भएको बहस नसकिएपछि मुद्दा आजका लागि हेर्दाहेर्दैमा राखिएको हो । हिजो ओली र लेखकका तर्फबाट कानुन व्यवसायीहरूले बहस प्रस्तुत गरेका थिए ।
गत भदौमा भएको जेनजी आन्दोलन सम्बन्धी घटनाबारे गठित जाँचबुझ आयोगको सिफारिसका आधारमा उनीहरूमाथि अनुसन्धान अघि बढाइएको हो । सोही क्रममा प्रहरीले चैत १४ गते ओली र लेखकमाथि नियन्त्रणमा लिएको थियो । उनीहरूमाथि ज्यानसम्बन्धी कसूरअन्तर्गत अनुसन्धान भइरहेको प्रहरीले जनाएको छ ।
पक्राउविरुद्ध राधिका शाक्य र यशोधा थापाले चैत १५ गते सर्वोच्च अदालतमा बन्दीप्रत्यक्षीकरणको निवेदन दायर गरेका थिए ।
यसैबीच, काठमाडौं जिल्ला अदालतले आइतबार उनीहरूलाई थप पाँच दिन हिरासतमा राखेर अनुसन्धान गर्न प्रहरीलाई अनुमति दिएको छ ।
प्रतिक्रिया