एजेन्सी । झण्डै पाँच दशकपछि मानवसहित चन्द्रमाको यात्रामा निस्किएको नासाको आर्टेमिस-२ मिशन सफलतापूर्वक सम्पन्न भएको छ ।
१० दिनसम्म चन्द्रमाको परिक्रमा गरेर चार अन्तरिक्ष यात्री सवार ‘ओरायन’ क्रु क्याप्सुल नेपाली समयअनुसार शनिबार बिहान प्रशान्त महासागरमा सुरक्षित अवतरण गरेको नासाले जनाएको छ ।
अमेरिकी नौसेनाको सहयोगमा सान डिएगो नजिकै समुद्रमा अवतरण गरेको क्याप्सुललाई उद्धार टोलीले तीव्र गतिमा सुरक्षित गर्ने कार्य अघि बढाएको छ । हेलिकप्टरबाट खिचिएका दृश्यहरूमा क्याप्सुल समुद्रमा तैरिरहेको देखिएको छ ।
ऐतिहासिक मिशनको नेतृत्व कमाण्डर रीड वाइजम्यानले गरेका थिए । चालक दलमा पाइलट भिक्टर ग्लोभर, मिशन विशेषज्ञ क्रिस्टिना कोच तथा क्यानेडियन अन्तरिक्ष एजेन्सीका जेरेमी ह्यान्सन सहभागी थिए ।
सन् १९७० मा सम्पन्न एपोलो-१७ मिशनपछि चन्द्रमाको यात्रा गरी सुरक्षित पृथ्वीमा फर्कने यी पहिलो मानव बनेका छन् । अवतरणपछि कमाण्डर वाइजम्यानले सबै सदस्य स्वस्थ रहेको जानकारी दिएका छन् ।
हाल अन्तरिक्ष यात्रीहरूलाई बाहिर निकाल्नुअघि क्याप्सुलको विद्युतीय प्रणाली बन्द गर्ने तथा अन्य प्राविधिक प्रक्रिया पूरा गर्ने काम भइरहेको छ । नौसेनाले इन्फ्लेटेबल प्लेटफर्मको सहायताले सुरक्षित रूपमा चालक दललाई बाहिर निकाल्ने तयारी गरेको छ ।
यस मिशनको सफलतासँगै नासाले सन् २०२७ मा प्रक्षेपण गर्ने आर्टेमिस-३ मिशनको तयारी सुरु गर्ने जनाएको छ, जसको उद्देश्य चन्द्रमामा दीर्घकालीन मानव उपस्थिति स्थापना गर्दै भविष्यमा मंगल ग्रहसम्मको यात्रा सम्भव बनाउनु हो ।
प्रतिक्रिया